Mitthlaa lang nomawi: Hammers tan beisei a thiang e!

Season hmasa khan point hnih lekin Champions League an khel phak lo a, David Moyes-a enkawl West Ham hi khawvelin a la ring tawk zo chuang lo.

Mahse, hmana Manchester United fan-ten duh taka 'The Chosen One' hming lem an pek hian Everton-a hming a lo chher tawh ṭhin chhan kha a pholang leh ta a, nomawi hial an sawi ri ta!

A mak asin - West Ham squad en ila, nomawi chawi tur khawpa ṭha an niin a lang lo. Mahse, he team hian tun season inelna hrang hranga Leicester City, Tottenham Hotspur, Liverpool, Manchester United leh Manchester City an hmachhawn tawhah an hneh vek.

Team 20 inelna Premier League-ah pathumna an ni mek a, Europa League group stage-ah tlawm nei loin last 16 an lut tawh a, League Cup-ah a thiam pariat zingah an tel tawh. Moyes-a hnathawh hi fak loh rual a ni lo.

Beiseina
West Ham-in Premier League-a an match hnuhnung berah Liverpool chu 3-2 in an hneh a, Jurgen Klopp-a naute hi match 25 chhung tlawm nei loa kaltluang tawh an nih avangin fak an hlawh hle.

Liverpool an hnehna inkhela goal khungtu zinga mi, West Ham forward Pablo Fornals chu league nomawi an chawi theih leh theih loh zawhna pek a ni a, league match 11-a goal li khung tawhtu hian beiseina a nei.

Fornals chuan, "Ka hre lo le - nomawi sawi tur chuan a la hma mah mah. Mahse, vawiina kan beih anga kan beih zel chuan duhthusam chu a thiang a ni lawm ni?" a ti a, duhthu a sam ṭan.

Hammers hian league match 11-ah vawi sarih hnehna an chang tawh a, vawi hnih an khingpui inhnehtawkpuiin vawi hnih an tlawm - ni e, an tan duh thu sam a thiang e.

Hmanah khan...
Thlamuang taka Everton a enkawl laiin Sir Alex Ferguson-a'n United-a a hmun ruak luah turin Moyes-a duhsakna a lantir a, Scottish manager hian Goodison Park chhuahsana a puanthuah telin Old Trafford a pan.

Mahse, top club meuh enkawl chu a lo hautak a ni ang. July 2013-a United zawmtu Moyes chu April 2014-ah ban a ni a, Red Devils fan-te beiseina chu mei khu ang maiin a zam ral.

Real Sociedad leh Sunderland lamah te Moyes a pem leh lawp lawp a, mahse, Everton angin a hming a chher thei tawh lo. November 2017 khan Premier League tlak hlau West Ham-in chhanhim turin an au a, thla ruk contract a ziak.

Thla ruk lek cham tura contract a ziak duh hian Moyes tlakhniam takzia a pholang - Hammers chu match hnih khelh tur la awm chungin Premier League a inhamtanpui a, mahse, contract thar an pe chuang lo!

Ṭanpui vartu hnai reng...
David Moyes ring zo lotu West Ham-in man to takin manager hriat hlawh Manuel Pellegrini an lalut a, mahse, Real Madrid leh Manchester City boss hlui hian an beisei angin a thlensanpui lo.

December 2019-ah meuh chuan team 20 telna Premier League-ah 17-na an ni a, relegation zone aṭanga an himna chu point khat chauh a ni. Hammers-in an dawh reng thei lo a, Pellegrini an ban.

West Ham-in mangan tawpah Moyes-a lam an hawi leh a, ani lahin lawm takin Hammers sawmna a lo pawm a, thla 18 chhung atan contract a ziak - a nihna takah chuan West Ham hian hlauhthawnna nen an ruai nawn a ni ber.

Mahse, Moyes a inringtawk a, Scottish coach hian, "Premier League aia kei aia chak record nei ṭha hi pahnih emaw pathum emaw vel chiah an awm ang. Chu chu ka hnathawh a ni - hnehna ka chang ṭhin a, West Ham tan pawh hnehna ka chang ang a, relegation zone kan tlan san ang," a ti.

Hei le Moyesiah
Moyes-a'n a thutiam a hlen - West Ham a himpui a, table-a 16-na ni chungin season an khar. Mahse, match 19-a point 20 a hlawhchhuahpui chu a thlak tak Pellegrini-a point hlawhchhuah aiin point khat chiahin a tam.

Hammers fan-ten Moyes tak tak an hmuh ṭanna chu season hmasa kha a ni. Point 65 nen season an khar a, table-ah parukna niin Europa League khel turin an inpetkai - heti zat point hi Hammers-in Premier League-ah an la hmu ngai lo.

June 2021 a herchhuah meuh chuan West Ham-in an rawih hmasak bera thla ruk contract an pek kha kum ruk chhung atan contract an ziahpui a, fan-ten an club chhandamtu hi a hming lemah Moyesiah an ti.

Heti chung hian mi tam takin Moyes an la ringhlel cheu a, vanneih vanga ngai an tam. Mahse, season tluana match 38 aṭanga vawi 19 chak theih hi vanneihna ngawt a ni seng bik lo a, 'engemaw' chu a awm a ni.

Moyes-a hnathawh
Rinhlelhna karah West Ham-in season bul an ṭan a, league match 11 hnuah pathumna dinhmun an luah avangin rinhlelhna mit nena thlir reng a rem lo - top ten chung lamah season khar pawh ni se Moyes hian fak a phu.

Scottish coach hian a player neih ang ang a hmang thiam a, Aaron Cresswell, Kurt Zouma, Vladimír Coufal, Pablo Fornals, Tomás Soucek, Declan Rice, Michail Antonio, Jarrod Bowen leh Saïd Benrahma ten a enkawlna hnuaia hma an sawnzia hi a hranpaa ziah fe tham a awm.

Tlarhnung a phui ṭha a, counter-attack hmanga nawr let turin player tlan chak an tam a, skills an nei bawk. Moyes-a hnuaiah set-piece hmanthiam an zir nasa tih a lang a, set-piece in a pui ṭhin hle.

Liverpool laka goal thum an khung zinga goal hnih kha set-piece aṭanga an khung ve ve a ni a, Moyes-a enkawlna hnuaiah league-a set-piece aṭanga goal an khung zat hi 32 a tling - an elpui zinga anmahni hnaih bertu aiin set piece aṭangin vawi ngain an pet goal hnem zawk.

Beiseina chu
Football khawvela thawnthu ngaihnawm leh danglam an sawi apiangin Leicester City-in 2015-16 season-a Premier League nomawi an chawi kha sawi rik a ni ṭhin a, tuna zawhna awm chu, "Leicester angin Hammers an champion ve thei ang em?" tih chu a ni.

Kha Foxes team khan Hammers nen inanna an nei - Ranieri anga manager danglam leh tawnhriat nei ṭha Moyes an nei a, player-te tuaihriam dan a thiam a, Moyes-a tan chuan an theihna sang bera khelh zel an duh.

Team angin an thawhhona leh inlungrualna a ṭha tih a lang a, player-ten match tinah an theihna zawng zawng an hlan ṭhin tih a hriat - hei hi Foxes champion ṭuma kan hmuh kha a ni.

Mahse, Premier League harzia inhrilh nawn a ngai lo. Khawvela coach ṭha ber ber Pep Guardiola, Jurgen Klopp, Antonio Conte leh Thomas Tuchel te awmna a ni a, Moyes leh a team tan champion em tur chuan thil mak a ngai tel ang.