Hmahruaitu nih inchuhna inkhel Italy mikhual tur Switzerland

Qatar World Cup 2022 khelh phak ngei tumin khawvel ram hrang hrang an inel mek a, zanin dar 1:15-ah pawh inkhel hmuhnawm bik a awm dawn. Group C hmahruaitu nih inchuhin Italy leh Switzerland an inhmachhawn ang.

Rome khawpuia stadium hmingthang Stadio Olimpico-ah Swiss team an lenglut dawn a ni a, a chak zawk chuan Qatar pan turin ticket an 'book' fel zui thei tura ngaih a ni, chak lo tan erawh playoff khelh mai beisei a ngai ang.

Italy leh Switzerland te hian match ruk aṭangin point 14 ve ve an nei tawh, playoff tal chu an khel phak dawn. Mahse, an tum ber chu group hmahruaitu ni chunga tlin nghal a ni dawn, ram pahnih inkhel tur hi a pawimawh hle.

Thil awmzia
Euro 2020 champion ni mah se Italy hi an duh angin an kal fawr ngawt thei bik lo. World Cup qualifying-ah chuan Bulgaria leh Switzerland nen an inhnehtawk a, an match hnuhnung berah erawh Lithuania 5-0 a sawpin an boruak pawh a ṭha.

Roberto Mancini naute thla hmasa khan Nations League semifinal-ah an chak lo, an hneh loh hi Euro laia an ngam Spain kha an ni. Major tournament an khelh lai ang boruak kha chu an nei phak tawh tih lo tih a chiang.

Zanina Switzerland an hneh a nih erawh chuan sang taka invawrh leh theihna a ni ang. Group match hnuhnung ber atan Northern Ireland an tlawh dawn a, hmahruaitu nih leh nih loh chu anmahni kuta innghat a la ni.

October thla bikah chuan Switzerland hian boruak an nei ṭha. Northern Ireland (2-0) leh Lithuania (4-0) te an hneh a, an elpui Italy nen an inhnehtawk bawk. Player khaikhin chuan Swiss hi team nem zawk an ni dawn, mahse tun hnaia an khelh dan thlir chuan dah hniam ngawt a rem bik lo.

Hliam vanga buaina
Training neihnaah Ciro Immobile, Giorgio Chiellini, Nicolo Zaniolo leh Lorenzo Pellegrini ten hliam an tuar a, coach Mancini tana buaina tham a ni - khelh dan tur pawh ruahmanna thar a neih ngei a ngai dawn niin a lang.

Azzurri hian an player neih dan thlir chuan, tlarhma laiah Lorenzo Insigne emaw Federico Chiesa emaw zawk an dah a rinawm. Tlarhnung laiah Lazio defender Francesco Acerbi chu Leonardo Bonucci kawppui tura a din a rinawm bawk.

Coach tana thu lawmawm erawh Nicolo Barella a dam tawh. Inter Milan midfielder hian training a zawm pangngai thei tawh a, midfielder ball thiam Marco Verratti awm lo mah se Jorginho leh Manuel Locatelli te an la neih avangin an inchingfel thei tura ngaih a ni.

Tlarhnung ven thiam Italy hian an duh a nih chuan an goal chu an venghim leh thei mai ang. Mancini-a'n Domenico Berardi, Insigne leh Chiesa te a chhawr dan a zirin an mamawh tawk goal pawh an khung a rinawm, an mual a nih bawk avangin chak tura rinkai zawk an ni ang.

Swiss pawh an buai
Hliam vanga Italy buaina a langsar a, an khingpui tur Switzerland buaina pawh a nep bik chuang lo. Captain Granit Xhaka bakah Haris Seferovic, Nico Elvedi, Breel Embolo, Gregor Kobel, Zesiger, Christian Fassnacht leh Zuber te chu hliam vangin an buai vek.

Midfielder Denis Zakaria erawhin hremna a hmang zo tawh, kum 24 mi Zakaria a inlan a nih chuan Swiss midfield chu a nghet leh sawt tura ngaih a ni a, amaherawhchu an khaipa Xhaka awm lo hi a hmunruak hnawh khah a harsa ang.

Ram tan match 36 a khelh aṭanga goal 16 khung thei Mario Gavranovic pawh a inpeih. Kum 31 mi Gavranovic hian tawnhriat a ngah tawh a, a kum tam lama vul leh hnuhnawh ni mah se Xherdan Shaqiri leh Renato Steffen ten an thlawp dawn avangin an hlauhawm dawn.

Murat Yakin-a naute hian an match hnuhnung berah Bulgaria an mikhual dawn, zaninah Italy nen an inhnehtawk a nih chuan a chung bera awm a harsa dawn. Chuvangin chak ngei ngei tumin Rome an pan dawn a, inkhel hmuhnawm an chhawp chhuak ngei ang.