Nets tan Durant leh Harden an vul

Nimin zing NBA regular season inkhelah Brooklyn Nets chuan Orlando Magic lakah 123-90 zetin hnehna an chang a, player ṭha Kevin Durant leh James Harden ten an thawhhlawk leh hle.

Harden-a'n 17 points, 11 rebounds leh 11 assists neiin triple-double a nei a, a team hi tun seaon bika a vawi riat nan hnehna a chanpui a, ṭum li chak loh nei ve tawh bawk mah se Durant nen an inkawp rem chuan an hmuhnawm chhunzawm ang.

Point nei thiam bik Durant-a'n point 30 zet a nei leh pek, tun season match 12 a khelh tawhah point 20 a la nei tling ziah - mimal anga season bul a ṭan ṭhat ber ṭum a ni a, Nets player zingah pawh hetiang ti thei hi an la awm ngai lo.

Inkhel dangah Stephen Curry a hmuhnawm leh hle. Match hnuhnung zawka point 50 zet a neih hnuah Curry hian Minnesota Timberwolves lakah point 25 a nei leh a, a team Golden State Warriors chu 123-110 in hnehna a chanpui.

Warriors hian hliam vangin an player pawimawh Draymond Green an chhawr thei lo, mahse Curry leh Andrew Wiggins an nei miau a, buaina tur a awm lo. Wiggins hian a team hlui lakah point 35 ngawt a nei a, tun season bika point a neih hnem ber ṭum a tawng.