Match hmasa berah Kontaveit a chak

WTA Finals chu Nilaini zan aṭang khan Panamerican Tennis Center, Mexico-ah khelh ṭan a ni a, tun hnaia khel ṭha ṭhin tak Anett Kontaveit chuan a boruak ṭha a la chhawm nung, a match hmasa berah Barbora Krejcikova chu 6-3, 6-4 in a hneh.

Seeded pariatna Kontaveit-i'n set pahnihah hian a tir lamah ve ve a khingpui service hi a chhuhsak, harsatna lian tham tawk loin bul a ṭan fuh hle. Tun hnaia match hnuhnung 29 aṭangin vawi 27 zet hnehna a chang ta.

Estonia nula Kontaveit chuan, "Nikum nipui lai vel kha chuan result ka nei ṭha lo, kumin tir lamah pawh ka chak mumal theih loh avangin ka buai. Tunah erawh ka beisei phak aia ṭha result ka nei chho mek," tiin a sawi.

Inkhel dangah Garbine Muguruza a chak lo. Spain nula hi a khingpui Karolina Pliskova lakah 6-4, 2-6, 6-7 (6-8) in a chak lo a, knockout a nih loh avangin chak lo mah se Muguruza tan semifinal luh beiseina a la awm.

WTA Finals hi season khat chhunga ranking sang zual pariatten an khel ṭhin. Kuminah hian world number 1 Ashleigh Barty chu a inlan thei lo a, number 9 tan hmun ruak pakhat a siam belh theih phah a ni.

Player inlan pariat hi group pahnihah an ṭhen hrang. Group Chichen Itza-ah Aryna Sabalenka, Maria Sakkari, Iga Swiatek leh Oaula Badosa te an awm. Group Teotihuacan lamah - Barbora Krejcikova, Karolína Pliskova, Mugu-ruza leh Anett Kontaveit te an awm thung.

Group pakhata player awm khawm palite hi an inkhel kual vek dawn, chumi hnuah a sang pahnih ten semifinal an lut ang. Semifinal aṭang hi chuan knockout a ni tawh dawn.