Man United ṭantu tam zawkin Solskjaer ban an duh
Tun hnaiah Manchester United an che ṭha lo. Ole Gunnar Solskjaer hote hi League Cup aṭangin an tla tawh a, Premier League-ah paruknaah an awm mek a, Champions League-ah pawh an dinhmun a ṭha chuang lo.
Old Trafford-ah Man United hi an hmelma Liverpool lakah 5-0 in an tlawm a, Norwegian manager Solskjaer an ban turah a ngaih theih. Amaherawhchu Man United-in Tottenham Hotspur 3-0 in an hneh a, Solskjaer-a dinhmun ziaawm deuh mah se Atalanta nen 2-2 a inhnektawk hramin Man City lakah 2-0 in an tlawm.
Social media lamah chuan #OleOut tih thawm a ri ring a, amaherawhchu club board lamin manager thar an melh lo. Ole Gunnar Solskjaer hi Man United board tam zawkin an la thlawp a, Joel Glazer-a'n a ban a nih ngawt loh chuan a la nghet. Chutihrualin Joel Glazer hian ban a tum tih thawm pawh a awm chuang lo.
The Athletic chuan Solskjaer chungchangah Man United ṭantu mi 4,000 ngaihdan an la a, heta ṭanga thlir chuan club supporter-te chuan Norwegian manager hi ban an duh.
Hna a thawk ṭha
Jose Mourinho an ban hnuah Solskjaer-a'n hna a thawk ṭha em, tih zawhna chu 51%-in hna a thawk ṭha tiin an chhang. Norwegian manager-in season bul aṭanga a enkawl hnuah Man United hi league-ah pathumna leh pahnihna an ni tawh.
2019-20 season khan FA Cup, League Cup leh Europa League-ah semifinal an lut vek tawh a, season liam ta khan Europa League final lutin League Cup-ah semifinal an lut leh bawk.
Solskjaer-a hnuaiah Man United result a chhe hran lo a, an supporter zinga 39% pawhin hna pangngai tak thawkah an ngai. Chutihrualin hna thawk ṭha bika ngai erawh 4% chauh an ni a, a thawk ṭha lo ti pawh 5% niin a chhe takzet ti chu 1% chauh an awm.
A thawk ṭha lo
Man United ṭantute hian Solskjaer hi hna thawk ṭha pangngaiah an ngai a, hei erawh season hnih leh a chanve chhunga a hnathawh aṭanga teh a ni. Tun dinhmuna teh erawh chuan club supporter pawhin thawk ṭhaah an ngai ta lo.
Club ṭantu zinga 47% zet chuan Ole hian hna a thawk ṭha lo an ti a, 44% in a thawk chhe takzet an ti thung. Tun dinhmuna la ngaidam thei chu supporter tlemte chauh an awm tawh a, 8% chauhin a thawk ṭha pangngai an ti a, 1% hnuai lam chauhin a thawk ṭha an ti.
Chhuak turin an duh
Premier League match 11 khelh tawh aṭangin point 17 an hmu a, paruknaah an awm mek. Table-a lang tel lo erawh an elpui leh hmelma Liverpool leh Man City lakah an zawr a, Man United ṭantute tan pawm thiam a har.
Man United ṭantu zinga 69% chuan chhuak nghal turin an duh a, 13% chuan hun pe belh leh hlek turin an duh. Season tawp thleng Solskjaer enkawl se ti pawl pawh an la awm a, 15% an ni pha. Season khat aia rei enkawl tura duh erawh 3% chauh an ni tawh a, Man United ṭantute chuan an manager hi ban thuai se an ti a ni ber.
The Athletic-in poll a lakah hian Cristiano Ronaldo chungchang pawh a awm a, Man United ṭantu zinga 70% chuan an lalet fuhah an ngai a, la fuh loa ngai erawh 30% an ni pha tho.
International break zawhah Man United-in Watford an hmachhawn dawn a, Solskjaer-a'n a hna chelh a duh a nih chuan Vicarage Road-ah point thum an hlawhchhuah ngei a ṭul ang.