T20 World Cup final-ah New Zealand vs Australia

Pathianni zan dar 7:30 hian New Zealand leh Australia ten Dubai International Stadium-ah T20 World Cup final an khel dawn. Black Caps leh Aussies te hi an la champion ngai lo a, champion thar an awm dawn tihna a ni.

Semifinal-ah inkhel hmuh-nawm chhawp chhuah a ni a, final pawh hmuhnawm turah a beisei theih. Australia tan tun inelnaa 236 runs siam tawhtu David Warner a pawimawh leh dawn a, chutihrualin mimala chet ṭhat ringawt a tawk lo tih chu semifinal-ah a lang.

Pakistan laka Aussies chakpuitu chu Matthew Wade a ni a, chutihrualin chet ṭhat zawn a har. Final-ah player dang an rawn inlar thei a, nomawi an chawi theih nan captain Aaron Finch a che ṭhat a ṭul dawn. Aussies bowler Mitchell Starc, Adam Zampa, Josh Hazlewood leh Pat Cummins te hming lam hmaih a thiang lo.

Ram pahnih hi T20 bika an inhmachhawn tawhnaah Australia an chungnung zawk a, vawi 14 an khelhah vawi kua an chak a, Black Caps hi ṭum nga an chak ve bawk.

Final khelhna tur Dubai-ah bat hnuhnung zawk nih a fuh dawn. Chutihrualin New Zealand hian Aussies laka ṭum nga an bat hnuhnun zawkah ṭum khat chauh an chak a, chutichung chuan ṭhumvawrah an chak a nih chuan bat hnuhnun an tlang ang.

New Zealand tan semifinal-a 46 runs siamtu Devon Conway chu an vawm out zawh chiaha thinurin bat a hnekna lamah a kut a hliam a, final a khel thei dawn lo. Conway aiah Tim Seifert a inlan thei ang.

Captain ṭha mi Kane William-son-a mawhphurhna a sang sawt dawn a, chutihrualin opener pahnih Martin Guptill leh Daryl Mitchell te an chet ṭhat rual chuan Aussies bowler tan pawh luhaina tham an tling dawn.

Black Caps all rounder James Neesham hi tun inelnaa strike rate nei ṭha ber zinga mi a ni a, bowling lamah Trent Boult leh Ish Sodhi te ṭum dang ang bawkin an pawimawh ang.