Wade-a'n Australia final a hruai thleng

Australia-in T20 World Cup final lut turin Ningani zan khan Pakistan chu chak lo thei dinhmuna an din hnuah wicket ngain an hneh. Sheikh Zayed Stadium-ah Pakistan-in 176/4 runs an siam. Matthew Wade-a'n over 19-naah a zawnin vawi thum six a vaw chhuak a, Aussies-in 177/5 runs siamin hnehna an chang.

Pakistan-in Super 12-ah an khingpui an hneh vek a, ṭhumvawrah chak lo mah se opener Mohammed Rizwan-a'n thi loin 67 runs a siam bakah Babar Azam-a'n 39 runs siamin Fakhar Zaman-a'n ball 32 lekah 55 runs an siam bawk. Pakistan-in 176/4 runs an siam a, over 19-na leh 20-naah Aussies bowler Pat Cummins leh Mitchell Starc te chet ṭhat zarah target sang zawk an nei ta lo.

Aussies bat hun a thleng a, captain Aaron Finch-a'n run a siam lo. David Warner a vanduai a, an appeal loh avangin 49 runs-ah a thi. Steve Smith (5 runs) leh Glen Maxwell (7) ten run an siam tam lo a, Marcus Stoinis (40) leh Matthew Wade (41) te hmangin over 19-naah 177/5 runs siamin hnehna an chang.

Over 19-naa thil thleng hi a ngaihnawm. Shaheen Afridi ball vawm chu Wade-a'n sang takah a vuaksak a, Hasan Ali-a'n a thlauh. Aussies -in run hnih an siam belh a ni ringawt lo a, Wade-a tan hun ṭha an siam sak. Kum 33 mi Wade hian a zawn zatin six vawi thum a vaw chhuak a, Australia-in hnehna an chang.