World Cup khel tur Brazil

Brazil chuan World Cup 2022 an khel dawn chiang ta. Tite-a naute hian Colombia 1-0 a hnehin Qatar panna tur ticket an la fel a, goal awmchhun hi midfielder Lucas Paqueta-a'n minute 72-naa a khung a ni.

World champion vawi nga ni tawh Brazil hian qualifier match 12 aṭanga point 34 hmuin South American ram 10 inel zingah hma an hruai, pahnihna Argentina aiin point kuain an sang zawk, match khatin an khel hnem zawk thung.

Brazil hi World Cup neih tirh aṭang khan an la tel char char, anni chauh hi inlan kim thei an ni! Champion hnem ber an nih bawk avangin ram leh ram inelna huangah chuan Brazil aia ropui zawk sawi tur dang an awm thei lo.

South America aṭang hian ram 10 ten World Cup qualifier hi an khel, vawi hnih ṭheuh an inkhelh chhuah hnuah a sang pali an tling nghal ang - pangana chuan playoff an khelh a ngai dawn. Brazil hian match 12 aṭangin point hnih bak hloh an nei lo hial.