Spain leh Sweden inchingfel dawn

"Pathianni zanah Qatar World Cup ticket kan neih fel ngei ka ring," tiin Spain coach Luis Enrique chuan a sawi a, an mikhual tur Sweden hneh chunga in pet tlin ngei an tum - anmahni muala inkhel tur an nih avangin beisei a nei sang hi a mak hran lo.

Spain hian Ningani zan World Cup qualifying inkhelah Greece chu Pablo Sarabia penalty chhuih luh hmangin 1-0 in an hneh, inkhel dangah Sweden chu Georgia lakah 2-0 in an tlawm thung a ni.

Group B-ah La Roja hian match sarih aṭanga point 16 hmuin hma an hruai mek, tlang turin Sweden laka point khat hmuh a tawk ang. Zlatan Ibrahimovic telna Sweden tan erawh playoff pumpelh tur chuan chak a ngai dawn thung.

Inrintawkna
Inkhel pawimawh an hmachhawn hmain Spain hian buaina an nei, player ṭha Pedri Gonzalez, Ferran Torres leh Marcos Llorente te chu hliam vangin an inlan thei lo a, anni hma hian Euro 2020 khel zinga mi Gerard Moreno, Mikel Oyarzabal leh Eric Garcia te an hliam tawh bawk.

Mahse, Spain hian Greece lakah hian sulhnu ṭha tak an nei a, khualmuala an inhmahchawn hnuhnung palina La Roja hian tlawm an nei miah lo, inringtawk tak chungin Athens Olympic Stadium an lut thei.

Rin lawk ang ngeiin Enrique nauten ball an chang tam, an goal neih chhun erawh minute 26-na a Sarabia khung a ni a, 73% ngawt ball possession nei mah se a dang an khung belh thei lo, tlarhma lamin intuaihriam an la mamawh hle.

Beisei an nei
Euro 2020 khelh dawn khan Luis Enrique-a player thlan danin mak tih a hlawh, mahse tournament an khelh meuh chuan Barcelona coach hlui hian thutlukna a siam dik tih kan hmu, qualifying khelh laiah pawh harsatna tawk deuh mah se Enrique a inringtawk hle.

Kum 51 mi Enrique chuan, "Group hmahruaitu nih loh lai kan nei, pahnihna dinhmun kan luah lai pawh khan ka hlauthawng ngai lo. A chhan chu kan khelh hmabak ngun taka ka chhut vang a ni," tiin Sweden chu an hneh theih ngei a ring.

Spanish manager chuan sawi zawmin, "Greece laka kan chak avang khan ka lawm, mahse hahchawlhna hun kan nei lo. Tun ang dinhmunah hi chuan hnehna chan a pawimawh a, boruak pawh a ṭhat zual phah," a ti a, an hmabakah erawh fimkhur a ngaih thu a sawi bawk.

Sweden an tlawm
Zlatan Ibrahimovic hoin World Cup khelh an tum a, an thawm pawh a lian. Mahse, Sweden-in beiseina an neih san vanglai takin Georgia lakah 2-0 in an tlawm, goal pahnih hi forward Khvicha Kvaratskhelia-a'n inkhel chawhnu lama a khung ve ve a ni.

Sweden tan Ibrahimovic leh Alexander Isak ten hun ṭha an hlah, AC Milan striker hian box chhunga a remchang hmuh chu goal zawnah a pet thei lo a, a vanneih ṭum ni se goal khat an phurh laiin a sut ngei ang. Mahse, Ibra meuh tan pawh zan duhawm a ni thei ta lo.

Janne Andersson nauten inkhel pawimawh taka point an hmuh loh avangin an kalkawng a harsa dawn. Anmahni aia team ṭha leh thiam zawk Spain hi Seville khawpuiah an hneh thei a nih erawh chuan World Cup ticket neih dan duhthusam a ni ngei ang.