Chak ngei ngei a ngai tawh - Hamilton

Lewis Hamilton chuan Formula 1 season kal laia intlansiak hmabak la awmah atan chak vek a ngaih tawh thu a sawi a, a nomawi kawl lai humhim tura theihtawp a chhuah chhunzawm tur thu a sawi.

Mercedes driver Hamilton hian kuminah vawi nga hnehna a chang tawh, a che chhe hran lo. Mahse, vawi kua ngawt chak tawh Max Verstappen chu a chungah a awm mek - driver pahnih inthlauhna hi point 19 lai a ni tawh.

Hamilton chuan, "Red Bull hian car an nei ṭha hle, kum tluanin ṭha taka an tlan theih chhan pawh a ni. A nihna takah chuan an car hi a chak berin ka hria," tiin an elpui team chu thiam takin a fak, tun hma pawhin Ferrari car nei chak tiin a lo sawi tawh bawk.

Britain tlangval chuan sawi zawmin, "A hniam zawk ni rih mah ila kan la beidawng lo, a tam thei ang ber chak kan tum dawn. A tawp thlengin kan bei dawn a, intlansiak kan hmachhawn leh tur zawng zawngah hian chetsual a thiang tawh lo," tiin a sawi.

Nipui chawlh an hman hnuah bik Hamilton hian vawi khat chiah hnehna a la chang a, inelna an neih hmabak Brazil-ah hian 2019 khan Verstappen a tlan chak ber, a sang zual pathum zingah Mercedes an lang pha lo a nih kha.

Season hmasa khan hripui leng vangin Brazilian Grand Prix hi an tlan lo, kumin atan Pathianni zan dar 10:30 hian an tlan dawn. Hamilton hi a chesual leh a nih chuan nomawi humhim a harsa tawh ang.

Kum 36 mi Hamilton hian F1 title hi vawi sarih a la tawh, champion hnem ber Michael Schumacher nen an intluk mek. Record thar siam thei tura ngaih a ni a, mahse kuminah Dutch tlangval Verstappen chu a kawng dal thei tur niin a lang.