Cricket inkhawmpui ropui ṭiak zan

UAE leh Oman ramah ICC T20 World Cup 2021 nghah a ni a, chawlhkar li zet ram 16 ten an khelh hnuin November 14, Pathianni zan dar 7:30-ah final khelh a ni dawn. Final ropui hmuh beiseiin, cricket khawvel chu a hmawr bawk turin a inpuahchah mek zel a, Zoram khawvel pawh kan bang bik awm lo e.

Inelna danglamna
World Cup ṭan hmain England, India, Pakistan te chu champion tura vote hmu sang pawl an ni ngei ang. Amaherawhchu Ningani zana final-a intum tur team pahnih an chian meuh chuan, khawvel chhim lam (Southern Hemisphere) ram ṭhenawm Australia leh New Zealand te a hmawr bawk turin an in vaw tling leh si a nih hi.

Aussies leh Kiwis te ropuina rama lut turin vawi khat an inchaltauh leh dawn a, team ṭha tak ni mah se rinkai ber chu an ni lo. Champion rinkai Virat Kohli hote phei chu final chu sawi loh semifinal pawh an thleng pha lo a, inelna lian tham erawh a danglam a, rinlawk ang vekin a thleng ṭhin lo.

Thlirletna
Mi nawlpui rinkai zawk leh group stage a pakhatna ve ve, 50 overs-a World Champion lai England leh Super 12-a chak vek Pakistan-ten semifinal-ah Aussie leh Kiwis te an hneh lo. Ṭhumvawra chakin kawngro a sut em avangin, semifinal-ah pawh hian ṭhumvawra chak zawkin vawm hmasak an thlang ve ve a, hnehna an chang ve ve bawk.

Nilaini zanah New Zealand-in over nga la awmah 60 runs mamawhin chutiang deuh chiah chuan Australia lamin Pakistan lakah Ningani zan inkhelah khan over nga chiah awm tawh tihah 62 runs an la mamawh ve bawk a nih kha. Over nga a la awm khan England leh Pakistan ve ve te dinhmun a ṭha zawk chiang.

Amaherawhchu infiamna khawvela tournament ropui World Cup te hi chuan hero a rawn herchhuahpui ṭhin. Final lut thei tura dinhmun duhawm taka ding, an hmelah pawh thlamuang tawh tak tih hriat English ho chu thawk leh khatah thlipui na takin a nuai thut ang maiin Kiwis batsman Daryl Mitchell-a'n a duhna lai laiah ball a hlapsak a, over khat la bang hial khawpin a team te a chakpui. English ho hrilh a hai ngei mai. England team hi batting lamah ṭha viau mahse, 'slog over' vawm thiam mumal an neih loh chu, game pawimawhah chiah a rawn lang chhuak ta a, an tum ram an thlen zawh tak loh phah kan ti thei ang.

A hma zan inkhel carbon copy emaw tih mai turin, Pakistan fans leh players te hmela hlimna leh final mitthla a lang chuai chuai tawh a. Mahse, tun tournament-a hnu hma la nei tlem tak Aussie keeper batsman Matthew Wade a hun a rawn inher chhuak a, mit khap kar lekin inkhel an thlak danglam vek.

Vawi tam tak a ball vawm thiam avanga Pakistan lo chawimawi tawh Hasan Ali-a'n Matthew Wade a ball hlap a dawn ṭhelh a, a hnu ball thumah hmelmate hliam laia chi phulsak ang zia zangin, Pakistan star bowler Shaheen Afridi a ball vawm chu a zawnin six vawi thum an hlapsak. Over khat khelh tur dah bangin Australia ho chuan Pakistan team leh mipuite an vel. Infiamna khawvel hi zawng a chang chuan a nun hi a rawng kan ti thei awm e.

Trans-Tasman Final
Infiamna khawvelah hian derby ropui tak tak a awm ang hian, he Pacific ram ṭhenawm Australia leh New Zealand te hi rugby, netball, field hockey a intum tur pawh ni se khawvel ngaihven an ni phak hrim hrim. Cricket lek phei chu, World Cup final a lo ni kher bawk nen, blockbuster a ni dawn chiang tih zawlnei ni miah lo pawn ka thailang hial ngam a ni.

New Zealand lamin ICC World Cup (50 overs) 2019 phuba chu England lakah semifinal-ah an la tawh a, Australia lakah hian ICC World Cup 2015 ( 50 overs) phuba la thei tak maw?

Bihchianna
Hmakhawsang aṭanga ICC Tour-nament-a khel chhe ngai lo, stage sang semi final/final stage thleng thei deuh ziah mah se Kiwis hian a vawrtawp an thleng hlei thei lo. An record duhawm lo zet hi Kane Williamson a kaihhruaina hnuaiah hian an thaibo dawn a nih chuan, tun tournament-a mit la ber zinga mi Daryl Mitchell leh a opener pui Martin Guptill a ten bul an ṭan ṭhat a ngai ngei ang.

Chutihrualin an tumpui tur Aussies ho ball vawm thiamte hi tunlai cricket khawvela bowling combination hlauhawm ber Mitchell Starc, Pat Cummings, Jose Hazlewood leh Adam Zampa te an ni tih theihngilh lo ila. Khawvel batsman hmuhnawm ber zinga mi 'Captain Cool' Kane Williamson-a'n a theihna a pholan ngei a ṭul ang.

Australia lam hi tun tournament-a form hmu let David Warner chungah nasa takin an innghat a, ball thar vawm che thiam Trent Boult leh Tim Southee te nen an inveh vel tur hi en ti châkawmtu pakhat a ni ngei bawk. T20-ah chuan khawvel bowler-te hlauh rawn ni mah se tun World Cup-a thawm la nei lo tak Glenn Maxwell leh Marcus Stoinis te hi stage sang atan an la inkhekkhal a ni thei a, Kiwi spinner Ish Shodi-a ten ngawih tlangtir an tum ang.

Ṭhumvawr! Aw, ṭhumvawr!
Cricket history, a bik takin T20-ah, tun World Cup ang reng renga ṭhumvawrin chak leh chak loh kawngro a sut hi a awm kher awm lo e. Final khelhna tur Dubai International Stadium bika vawi 12 inkhelah hian vawi 11 chu ṭhumvawra chak a, vawm hmasak thlangten hnehna an chang zel a, tun semifinal inkhel thleng pawh khan a la ni zel awm e.

Hei hi chhan pahnih chiang tak a awm. Dubai tlai thim hlim, anmahni huna zan dar 6:00-ah inkhelh ṭan a ni. Tlai ni tlak hlim thli leh boruak inthlak chuan ball a ti che nasa em em a, pitch a hnim tlem awmah ball a sawt kawiin a sawt sang bik a, spinner-ten ball an vawm kawi thei phah bawk.

Dubai ground zau takah hian boundary pel pha (six runs) chiah lo a, fielder-te man nuam tawk tur a tam phah a ni.

Dubai sanaa dar 8- 8:30 velah vaw hmasa team-te vawm hun a thlen chhohah zantir boruakin dai a ti tla a, chu chuan swing leh seam movement a tibo. Spinner tan ball hnawng deuha vawm a har a, batsman-te tan, speed nuam tawk chiahin ball a sawtin a lokal ta ṭhin. Hei chauh ni loin zan reiah boruak hi a pan ta deuh niin an sawi a, vuak nat zawng inangah a vaw hnuhnung zawk vuak hi a thlawk thui zawk a, runs siam hnem a awl phah.

New Zealand leh Australia inkhel turah pawh hian ṭhumvawra chak chuan vawm hmasak an thlang ngei ang a, inchawina hmunpui lamah pawh ṭhumvawr a zirin team bukrit zawk dinhmun a insiksawi ngei ang.

Champion Thar
Champion tur sawi lawk theih an ni lo a, thil chiang erawh a awm. T20 World Cup-a champion ngai lo team pahnih an inhmachhawn avangin champion thar an awm dawn.

ICC World Cup ( 50 overs) leh Test Cricket-a hnuhma nei ropui ber Aussies ho tan final a pawimawh, an nomawi dahna hmunah T20 World Cup nomawi hmuh tur a la awm lo. Chutihruallin ICC nomawi hum tur ngah lo tak New Zealand hovin, tun hma aṭanga khawvelin remark an pek, "Thlen chu an thleng sang, mah se an champion thei lo," an tih ṭhinna ṭawngkam an dawn tawh zozai hi thai reh a, Hnehna Hlado nena, an ram mipuiten an hmuh khat tak Wellington khawpuia champion parade neih hi an tum ber tur a ni ngei ang!

Tun Pathianni zan chu, Cricket Kutpui khar nan hlim taka World Cup Final en vek thei turin duhsakna ka hlan vek a che u.

- K. Vanlalruata