South Korea leh Japan an chak
Asia khawmualpui aṭanga World Cup khel tur ram pawh kan hre hnai zel. Ram langsar inlan zingah South Korea chuan 1-0 in United Arab Emirates an hneh a, Hwang Hee-chan chuan penalty aṭangin goal awmchhun hi a khung.
Group A inkhel dangah vanneihnain Iran lam a ṭang a, injury time-a Sardar Azmoun leh Ahmad Nourollahi goal hmangin Lebanon chu 2-1 in an hneh. Group A-ah Iran-in hma an hruai zel a, an hnuai chiahah South Korea an awm.
Group B inkhel ngaihven hlawhah Australia leh Saudi Arabia chu 0-0 in an inhnehtawk a, Japan chuan Junya Ito goal hmangin Vietnam chu 1-0 in an hneh thung - table-ah pathumna an ni a, an chungah Australia leh Saudi an la awm avangin hmabak a la hautak hle.
Korea beiseina
South Korea-in penalty hmangin UAE an hneh hram angin lang mah se inkhel pumpui thlirin chak phu zawk an ni - Tottenham Hotspur forward Son Heung-min a hmuhnawm a, chance vawi tam a nei a, vawi hnih ngawt woodwork a tih per.
Taeguk Warriors (South Korea sawina) tan striker ṭhangduang Cho Gue-sung chuan post a tih per bawk a, Wolverhampton Wanderers tana season duhawm tak hmangtu Hwang Hee-chan chuan penalty aṭangin an phu ang ngeiin goal a khung.
South Korea hian match nga an khelh aṭangin point 11 an nei a, hmahruaitu Iran chu point hnih lekin an phak lo mek - an hnuaia awm Lebanon-in point nga chiah an la nei a, match nga khelh tur la awm mah se South Korea tan World Cup khel turin beiseina a sang hle.
Iran vanneihna
Minute 90 chhungin vawi 21 ngawt shot nei mah se Iran an vannei tih a ṭul - an goal khung pahnih chu injury time-a lut a ni tlat! Iran hian Lebanon lakah bul ṭan ṭha viau mah se an inrin loh laiin goal an chhuah thut!
Mualneitu Lebanon tan MLS lama Sunil Chhetri-a club hlui Sporting Kansas City tana lo khel tawh Soony Saad chuan minute 37-na lekah goal hmahruai a khung a, an chak chuan World Cup khelh beiseina a la nun theih avangin an ṭang zui thei hle.
Lebanon tan Mohamad Haidar chuan goal khung belhna remchang a nei hial a, a chhawr lo - a tawpah erawh team ṭha zawk an vannei. Zenit Saint Petersburg striker Azmoun leh UAE club Shabab Al Ahli tana khel Nourollahi ten goal khat ve ve an khung a, 2-1 in an chak a, group A-ah hma an hruai chhunzawm.
A la tawp lo
Group B-ah ram ṭha pahnih Australia leh Saudi Arabia an inkhel a, goal khung loin an inhnehtawk - he group-a pathumna Japan tan result lawmawm a ni a, Japan hian tun hnaia ram ṭhangduang tak Vietnam chu 1-0 in an hneh.
Africa Cup of Nations-a Zambia leh Ivory Coast lo champion pui tawhtu Hervé Renard hnuaia khel mek Saudi hian point 13 neiin hma an hruai mek a, pahnihna Australia-in point 10 an nei mek - Japan-in an chak avangin point kua an nei ve ta bawk.
Japan tan Vietnam lakah Belgian club ṭha Genk tana khel Ito chuan goal awmchhun a khung a, point thum hlu tak an hlawh chhuak - an hnuaiah Oman (7 pts) leh China (4 pts) an la awm bawk avangin group B hi a la ngaihnawm dawn chauh niin a lang.
Qualifier Kalphung
First round: 2022 FIFA World Cup qualification (AFC) hi first round aṭanga khelh ṭan a ni a, hetah hian team 12, FIFA ranking-a 35-46 na te home & away hmangin an inkhel a, a chak paruk chu second round an lut.
Second round: Rank 1-34 leh first round aṭanga inpetkai team 40 te an inel a, team panga zel awmin group pariatah ṭhen hran an ni a, group tina pakhatna leh pahnihna ti ṭha pali chu third round-ah an tlang.
World Cup thlengtu Qatar chu tling sa an ni a, an group-ah hmahruaitu an nih bawk si avangin an hmun ruak la awm hi pahnihna ti ṭha zinga panganain an luah zui. Second round-ah hian India chu group E-ah Qatar, Oman, Afghanistan leh Bangladesh te nen an awmho a, pathumna niin an tlang zo ve ta lo.
Third round: Third round-ah hian team 12 an inel a, group pahnihah team paruk ve ve awmin ṭhen hran an ni - group pahniha a sang pahnih hi Qatar-a World Cup khel turin an tling chiang ang.
Fourth round: Third round group pahniha pathumna team ve ve chu single match khelin an inhmachhawn leh ang a, he inkhela chak zawk hian inter-confederation playoff hmangin World Cup khelh an la beisei ve leh thei a ni.