Germany-in goal kua an khung

Ningani zan khan Germany-in player 10-a khel Liechtenstein chu World Cup qualifier-ah 9-0 in an sawp. Hansi Flick-a'n match hmasa parukah hnehna a chang a, Germany coach zinga match hmasa paruk chak hmasa ber an ni.

Niklas Sule-a'n Covid-19 a kai avangin Bayern Munich defender leh a kaihhnawih player pangaten Liechtenstein an hmachhawn thei lo. Flick-a'n loh theih loin squad siksawi deuh mah se minute 9-na lekah mikhual defender Jens Hofer chu hnawhchhuah a ni a, Germany tan hna a awlsam.

Ilkay Gundogan-a'n minute 11-naah penalty aṭangin a khung a, a khat mawi tawkin Germany-in an khung zui. Leroy Sane leh Thomas Muller ten goal hnih ve ve an khung a, Marco Reus leh Ridle Baku ten goal khat ve ve an khung bakah Daniel Kaufmann leh Max Goppel ten an lamah an tilut bawk.

Inkhelh banah Hansi Flick chuan, "Kan khelh danah ka lawm a, goal khung tam hian min tihlim ṭhin. Goal khung hma kha kan ṭhatpui a, goal kan khung hnuah pawh khan goal khung belh zel duhin theihtawp kan chhuah," tiin a sawi. Bayern Munich manager hlui Flick-a kaihhruaina hnuaiah Germany hi FIFA World Cup 2022 khel tura tling hmasa ber an ni.