Norwich leh Lampard an inhnaih zel

Premier League mawngphah luahtu Norwich City chuan Frank Lampard lakluh tumin indawrna an kalpui mek a, Chelsea legend hi English top flight league-ah kan hmu leh a nih pawhin a mak lo ang.

Norwich hian league match 11-a vawi khat chiah hnehna an chan hnuin Daniel Farke an ban a, vawiinah emaw kar thar tirah chuan an coach thar tur hi an puang hman tura beisei a ni - Lampard chauh an dawr lo thung.

Kum 43 mi Lampard hi January khan Chelsea chuan an beisei ang result an neih loh avangin an ban a, Stamford Bridge a chhuahsan hnu hian English midfielder ropui ṭhin hian hna a nei leh tawh lo.

International break avanga an chawlh hnuah Norwich hian nimin khan training an nei leh tawh a, head of football development Steve Weaver hoin training an nei rih phawt a ni.

Lampard hian Chelsea-a a season hmasa berah player lakluh a nei lo a, heti chung hian league-ah palina nihpuiin FA Cup final a hruai thleng bawk - fak a hlawh hle.

Mahse, season hmasa ṭan dawn khan player thar lei nan pound maktaduai 200 chuang a seng a, December thlatira 3-1 a Leeds United an hneh khan Premier League table chung ber an luah hman hial.

Lampard hi a che fuh rei lo thung - January khan hmahruaitu a nihpui hman club hi pakuanaah a tlak thlakpui a, Chelsea board-in dawhthei loin an ban.

Hetihlai hian Aston Villa chuan coach atan Steven Gerrard an lalut a, Crystal Palace-ah Patrick Vieira a awm sa bawk - Lampard hian Norwich enkawl se, player an nih laia inel na takte Premier League-a an inel leh tur hi en a châkawm khawp ang.