Ireland-in Ronaldo telna Portugal chelh

Cristiano Ronaldo-a'n record thar siam zel duhin ram tan match khel zel mah se Republic of Ireland lakah goal a khung thei lo a, Portugal hian an mikhual Ireland chu World Cup qualifier-ah 0-0 in an inhnehtawkpui.

Ronaldo telna Portugal-in hnehna chang zo lo mah se an dinhmun a danglam phah lo. Pathianni zan dar 1:15-ah Serbia nen an inkhel dawn a, Ireland an tawn hma ang thoin Serbia laka draw result an hlawhchhuah chuan World Cup khel turin an tling ang.

Portugal hian match sarih khelh tawhah point 17 an nei mek a, Serbia nen an point hmuh zat a inang. Mahse, goal difference-a an ṭhat zawk avangin Serbia nena an inkhel tur atan draw result a tawk.

Mahse, Portugal hian Ireland lakah chanchin lawmawm lo an nei a, defender Pepe chu yellow card pahnih a hmuh avangin minute 81-naah hnawhchhuah a ni.

Kum 38 mi defender hian a kum tam hnuah pawh a nungchang a la thlak lo a, Serbia a hmachhawn ve thei lo ang.

Ireland hian chak turin chance an nei hial. Mahse, Chiedozie Ogbene leh Enda Stevens ten chance duhawm an hlah a, Matt Doherty goal khung chu pawm loh a ni bawk.

Tottenham Hotspur defender Doherty hian injury time-ah goal a khung a, mahse, Ireland tana a vawi khat nana inlan Will Keane chu Portuguese keeper Rui Patricio laka a lo foul avangin pawm a ni lo.

Portugal boss Fernando Santos-a'n Ireland nena inkhel aiin Pathianni zana Serbia nena an inkhel tur a ngai pawimawh zawk a, Manchester City defender pahnih Ruben Dias leh Joao Cancelo bakah Liverpool forward Diogo Jota te bench-ah a dah - beisei tur nei tawh lo Ireland laka an result hi an hnual phah lo ang.