Hero Futsal Club C'ship ; Mizo tamna Delhi an champion

AIFF hnuaia India ram pum huap futsal inelna hmasa ber Hero Futsal Club Championship chu Inrinni zan khan final khelh a ni a, Mizo pasarih awmna Delhi FC-in Mohammedan SC 7-2 a hnehin an champion.

Indira Gandhi Indoor Stadium, New Delhi-ah Mizo rawlthar Lalpekhlua'n goal hmahruai a khung. Most Valuable Player-a thlan Nikhil Mali-a'n goal nga a khung bakah Rohit Haresh Mulchandani-a'n goal khung ve bawkin final hmuhnawm takah Delhi FC-in goal sarih ngawt an khung.

Delhi captain Nikhil Mali a langsar a, final-a che ṭha thut a ni lo. Mali hian tun inelnaah goal 28 a khung a, match tinah goal thum tal a khung tling vek.

Inelnaah hian India ram hmun hrang hrang aṭangin team thlan bik 16 an tel a, Mizoram aiawha tel Chanmari Zothan Futsal Club-in group stage an paltlang lo.

Chutihrualin champion team Delhi FC-ah hian Mizo player pasarih ngawt an awm a, hmun pawimawh an chang pha. Mizo player-te hi Tata Trusts Centre of Excellence (COE) aṭanga inzir chhuak an ni.

Mizo player-te chu - Jojo Zaihmingthanga (Kanan Veng), Lalpekhlua (College Veng), Isac Zomuanpuia (Sihphir Arpu Veng), Lalremruata (Sihphir Arpu Veng), F. Malsawmdawngpuia (New Champhai), Lalrosanga Hrahsel (Serkawn, Lunglei) leh Lalhmunmawia (Mualpui) te an ni.

Inelnaa player langsar ber Delhi captain Nikhil Mali chu Most Valuable Player-a thlan a nih bakah goal 28 khungin top scorer a ni a. Delhi FC goalkeeper Scott Richard Moraes chu best goalkeeper ah thlan a ni a, Mangala Club (Odhisa) hnenah Fair Play award hlan a ni.

Final-ah hian MFA honorary secretary Lalnghinglova Hmar chu a hmunah a tel a, ani hi AIFF-ah executive committee member a nih bakah League Committee-ah Deputy Chairman a ni bawk.