France an tling, Mbappe-a'n goal li a khung

World champion France-in Kazakhstan 8-0 in an sawp a, Les Bleus-in Qatar zinna ticket an nei ta. Didier Deschamps-a hote tan hian Kylian Mbappe-a'n goal li a khung a, Karim Benzema-a'n goal hnih khungin Adrien Rabiot leh Antoine Griezmann ten goal khat ve ve an khung bawk.

Group D-ah France-in point 15 an hmu a, pahnihnaah awm Finland-in point 11 chauh an hmuh avangin an umpha thei tawh lo. November 16, Thawhlehni zan hian France leh Finland hi an inkhel dawn a, Les Bleus tan inkhel pawimawh ni tawh lo mah se Finland tan erawh playoff khel turin point hlawhchhuah a ngai thung.

Parc des Princes-ah France-in bul an ṭan ṭha a, minute 30 chhungin Mbappe-a'n goal thum a khung tawh a, minute 87-naah PSG forward hian goal lina a khung. Mbappe goal khung inkarah hian Real Madrid forward Benzema-a'n goal hnih a khung a, Rabiot leh Griezmann ten goal khat ve ve an belh bawk.

Kum 1985 khan Dominique Rocheteau-a'n France tan hattrick a siam a, hemi hnua competitive match-a France player tana hattrick siam leh hmasa ber chu Mbappe hi a ni.

France tan Kazakhstan hneh hi thil harsa ni lo mah se an inkhelh hun avangin an inkhel hi a chhinchhiahtlak. November 13, 2015 khan Paris-ah France leh Germany inkhelh laiin hel pawlin France khawpui an bei a, hmun hrang hrangah mi 130 lai an thi.

Griezmann pawhin kum ruk liam taa thil thleng hi a hre reng a, a goal khung lawm nan a jersey hnuaia a kawr hakah '13/11/15' tih leh hmangaihna chhinchiahna a ziah chu a pholang.

France coach Didier Deschamps chuan, "Football tan ni duhawm tak a ni a, hun liam taa kan thil tawn rapthlak tak kha kan hre reng. Kan tum chu World cup khel tura tlin a ni a, chumi belhchhah tur chuan mawi taka khelh kan tum. Kan khelh dan a lungawi thlak hle," tiin inkhelh banah a sawi.