World no. 1 an tling

Inrinni zan khan Belgium-in Estonia 3-1 in an hneh a, FIFA ranking-a number 1 Red Devils hi FIFA World Cup khel turin an tling.

Roberto Martinez-a'n inhliam vangin Romelu Lukaku chhawr thei lo mah se goal khung kawngah harsatna an tawk lo. Minute 11-na lekah Estonia goalkeeper Matvei Igonen-a'n Yannick Carrasco cross a tih per avangin Crystal Palace striker Christian Benteke-a'n goal hmahruai a khung nghal.

Carrasco hian minute 53-naah Benteke pass chu yard 25-na aṭangin kawh zetin a pet lut. Estonia tan Erik Sorga-a'n minute 70-naah siphurh sut ṭhen mah se mualneituin goal khungna chance an ngah a, goal tam zawk an chhuah lo hi an vannei.

Minute 74-naah Thorgan Hazard-a'n mawi zetin a pet lut a, Belgium-in 3-1 in an hnehna an chang. Martinez-a hote hian group E-ah point 19 hmuin hmahruaitu an ni a, Wales (14 pts) leh Czech Republic (11) ten playoff khel tur an zawng ang.

November 16, Thawhlehni zanah Belgium hian an match hnuhnung berah Wales an hmachhawn dawn a, Martinez leh a hoten hahdam zawkin an khel thei tawh dawn a ni.