Argentina-in World Cup an hnaih ta
Qatar World Cup khel turin Argentina chu dinhmun ṭha takah an ding tawh a, an khelh hmabakah chak lo pawh ni se midang inkhel result a zirin an tling phak tawh dawn - chhiarkawp danin la tla thei mah se tling chiang tawh anga sawi ngam an ni.
Argentina hian Inrinni zing khan an mikhualna ramah Uruguay chu 1-0 in an luhchhuah, goal awmchun hi minute sarihna leka Angel di Maria khung a ni a, tun hnai an match hnuhnung pangaah Lionel Scaloni nauten clean sheet an nei leh ta.
Messi telna
Paris Saint-Germain tan Lionel Messi-a‘n hliam vangin match hnuhnung pahnih a khel thei lo, ram tan erawh koh a ni tho - sawisel hlawh deuh mah se dan ang thlap a nih avangin buaina tur erawh a awm hran lo.
Argentina coach Scaloni-a‘n Messi hi bench lamah a dah a, tlarhmaah Lautaro Martinez leh Paulo Dybala te an inkawp, a sirah Angel di Maria leh Giovani Lo Celso te an awm thung, an mamawh zat goal an nei hma hle.
Juventus forward siamsak chu Di Maria-a‘n a khung a, anmahni goal an venhim theih avangin chak nan a tawk. PSG star Di Maria hian Copa America final-ah khan Brazil an hnehna goal pawimawh leh awmchhun a lo khung tawh bawk.
Hmabak Brazil
Argentina hian an match lehpek atan November 17, Nilaini zingah Brazil an mikhual dawn. Tite naute hi tling chiang tawh an ni a, ram pahnih hian an elpui dangte aiin match khatin an khel tlem zawk, an intawn hmasakin an khel zo thei lo a ni.
La Albiceleste tan World Cup ticket nei tur chuan point khat hmuh belh chauh pawh a tawk dawn. An chak lo a nih pawhin an elpui dang - Uruguay, Colombia leh Chile zinga chak zo lo an awm a nih chuan Messi te ram hi an tlang dawn tho.
A tawi leh awlsam zawnga sawi chuan Argentina dinhmun a ṭha tawh takzet. Tlarhma lamin goal khung an harsat lo a, hnehna an chan theih nana pawimawh chu tlarhnung phui ṭha a ni bawk, tun hma lama an chak tawk lohna defence an rem phui avangin beisei pawh an nei sang.
Dinhmun ṭha lo
South America aṭangin ram 10 ten World Cup qualifier hi an khel. Vawi hnih ṭheuh an inkhel kual dawn a, chumi hnuah a sang pali an tling nghal ang. Tun dinhmunah chuan - Brazil, Argentina, Ecuador leh Chile te dinhmun a ṭha.
Pangana tan chuan playoff khelh a ngai dawn, tuna pangana chu Colombia an ni. World champion hmasa ber Uruguay chu playoff pawh khel phak lo thei dinhmunah an ding mek a, khelh hmabak panga an la neih avang erawh chuan dinhmun siamṭhat theihna hun an la nei.
Luis Suarez, Edinson Cavani leh Diego Godin te awmna Uruguay hian player chu an nei ṭha tawk viau, an hmabak hmasa atan Nilaini zingah Bolivia an lenchilh dawn, Bolivia hi a hniam ber dawta awm ni mah se an ramah inkhelh a harsat avangin Suarez leh a ṭhiante tan fimkhur a ngai ang.