Kane 3; England 5; Maguire an sêl!

England-in World Cup qualifier-ah 5-0 ngawtin Albania an sawp a, Harry Kane chuan hattrick a siam - zanin dar 1:15-a San Marino laka point an hlawhchhuah chuan Three Lions hi World Cup khel turin an tling ang.

Three Lions tan Kane bakah Harry Maguire leh Jordan Henderson ten goal khat ve ve an khung bawk a, inkhel zawha sawi hlawh ber erawh Maguire-a goal khung lawm dan chu a ni.

Manchester United captain hian a beng hup chungin a goal khung a lawm a, tun season-a club tana a khelh chhiat êm avanga sawisel hlawh defender hian amah sawiseltute a tih elnaah an ngai.

United legend Roy Keane chuan, "Goal a khung vang maiin amah seltute a ngawihtir taah a inngai a, a zahthlak takzet a ni," tiin a club hlui captain chet dan chu zahpuiawm a tih thu a sawi.

Inkhel chu
England-in an mikhual Albania lakah goal khung turin hun an mamawh rei lo a, minuite kuana lekah Maguire chuan Reece James-a freekick aṭanga ball kal chu a tauh lut.

Three Lions-in 1-0 a hma an hruai lai hian Albania-in si phurh sutna remchang an nei a, Kyle Walker-a tihsual zar zoa Myrto Uzuni-a chance duhawm chu keeper Jordan Pickford chuan ṭha zetin a dang.

Mahse, hei bak hi chu Albania-in sawi tur an nei tawh lo - minute 18-naah Kane chuan Henderson-a siamsak aṭangin goal a khung ve leh a, Tottenham Hotspur striker hian Hendo duhsak letin minute 28-naah Liverpool captain hian a khung ve leh bawk.

England an hawikir tawh lo - Kane-a'n minute 33-na leh first half hun pek belhah a khung leh a, goal pahnih hi goal mawi bik a ni. Three Lions-in first half-ah goal nga an khung fel der. Second half-ah khung belh lo mah se first half-a an goal khung hi chak nan a tawk.

A hming Kane
Kane-a'n season duhawm lo tak a hmang mek a, Premier League-ah match 10 khelin goal khat chiah a khung. Kum 28 mi striker hian Albania an hmachhawn hmain Euro 2016 final-a an tlawm leh Manchester City a zawm thei lo khan a rilruah nghawng lian tak a neih thu a sawi.

English striker chhuanvawr hian, "Ka mangphan ṭhin ram kan thleng ṭep a, a dawn takah kan hloh leh si. A vawi khat nan nipuiah transfer chanchin ka nei a, hetiang boruak leng vel hian rilru a khawih tel nasa em a ni," a ti.

Season a hman chhiat chhanah Kane a ṭawng chhuak a, a ṭhat dan berin a khel chhuak leh ta bawk. England hmachhawn hi Albania an nih avangin sawi nep theih a ni a, chutihrual chuan Kane-a goal thum khung leh a khelh dan pumpui thlira sawi nep ṭalh erawh a rem lo.

Kane hian ram tan match 66-ah goal 44 khungin amah ang thoa Spurs legend Jimmy Greaves-a'n England tana goal a khung zat chu a nih rual a, ram tana goal khung hnem ber Wayne Rooney (53 goals) khung zat khum tur erawh chuan a nghah rei a la ngai hret ang.

Maguire an sêl
England defender Maguire-a'n beng hup chungin goal khung a lawm ngawt a, season a hman chhiatzia leh United dinhmun thlir chungin football fans an lawm lo a, football expert ho phei chu English defender lakah an insum lo hle.

ITV pundit Keane chuan, "A kutin a beng a hup a, amah sêltute a chhanletna ni ngeiin lang mah se a zahthlak a ni. Tun hnaiah United tan zahpuiawm khawpin a khel a, amah sawiseltute ka hup taah a inngai ringawt. A zahthlak a ni," a ti a, a club ṭan em em captain a dim lo.

Tottenham Hotspur striker hlui Jermain Defoe chuan, "Khatianga goal khung lawm kha a ṭul lo. Goal a khung a, goal ṭha tak chu a ni. Mahse, mipui lawm lohna a siam tel a, a khelh chhiat hun huna tih el turin fans an inpeih at tawh ang," a ti a, Maguire chu thil ṭul loah a inhambuai thu a sawi.

Arsenal legend Ian Wright chuan, "Kei pawhin ka ti mai thei a, mahse, thlirkir chuan, inkhelh tur tam tak a la awm a, tih tur ṭul lo a ni. Fan-te hi min sêlna chance kan pe tur a ni lo a, ṭha takin inkhel mai rawh Harry," tiin United captain chu thurawn a pe.

Maguire chhantu Southgate
England coach Gareth Southgate-a'n United tana a khel ṭha lo chungin Maguire chungah a rinna a nghat tlat a, ram tan a koh chhunzawm zel avangin sawisel pawh a hlawh. Southgate hian sawiselna karah a nau a chhan leh ta.

Southgate chuan, "Hulk Hogan-a fan a ni em? ka hre lo a, eng atana khatianga a goal khung lawm nge a nih pawh ka hre lo. Mahse, player ṭha tak a ni a, thla hniah liam ta maiah khan Euro team of the tournament-ah a tel a ni," a ti.

England coach chuan sawi zawmin, "September-ah a inhliam a, mahse, a club a ngaihtuah em avangin hmanhmawh takin inkhel turin a lo kir leh a ni. Player tam tak chu hetiang hunah hian inenkawlin an biru ṭhin a, ani erawh chuan a ti ve lo.

"Mahse, 100% fit lo chung pawhin 100% a fit player-te nen an khaikhin leh tho si. Ṭha takin kan titi dun a, kan team tana a pawimawhzia ka hrilh nawn. Zaninahte khan a khel ṭha em em a ni," a ti a, a player a fak.