England tan Gallagher koh a ni

Zanin dar 1:15-ah England-in San Marino an lenchilh dawn a, player panga an inlan theih dawn loh avangin Crystal Palace midfielder Conor Gallagher chu Three Lions tana inlan turin a vawi khat nan koh a ni.

Jack Grealish, Raheem Sterling, Luke Shaw, Jordan Henderson leh Mason Mount te chu San Marino-ah hian an zin thei dawn lo a, season duhawm tak hmangtu Gallagher tan vanneihna a chang.

Henderson leh Grealish ten hliam tenau an neih avangin Liverpool leh Manchester City-ah an dinhmun enfiah turin an kir a, City forward Sterling chu mimal thil avangin a zin thei dawn lo thung.

Chelsea midfielder Mount chu a ha an zai avangin England tan a inlan thei dawn lo a, Manchester United left-back Luke Shaw chu City nen an inkhelh ṭuma Joao Cancelo nen an intauh avangin a lu lamah harsatna a nei mek bawk.

Kum 21 mi Gallagher hian Chelsea aṭangin Palace hi loan-in a zawm a, league match 10 a khelh tawhah goal li khungin assist vawi hnih a nei thei.

India-in kum 2017-a FIFA Under 17 World Cup a thlen ṭuma champion England U17 team-a tel Gallagher hi kar hmasa lawk khan England U21-in 3-1 a Czech Republic U21 an hnehna inkhelah a inlan a, kar khat em pawh a liam hmain senior team-ah koh a ni.