Semifinal-ah Kontaveit a lut

WTA Finals 2021 khelh laiah Anett Kontaveit chu semifinal lut thei hmasa ber a ni. Kontaveit hian Karolina Pliskova chu 6-4, 6-0 in a hneh a, a group match hmasa pahnihah a chak avangin khelh hmabak nei chungin a tlang.

Guadalajara, Mexico-a inelna neihah seeded pariatna Kontaveit hi ranking hniam ber a ni a, mahse season a hman ṭhat a chhawmnung zel a, inrintawkna a neih tam miau avangin midang tan dan theih a ni lo.

Tun hmain player pahnih hi vawi thum an intawng tawh a, Czech Republic nula Pliskova hi a chak vek. Vawi li an intawnnaah erawh Kontaveit hian kawng engkimah inkhel a thunun a, harsa lo takin hnehna a chang.

Kum 24 mi Kontaveit chuan, "Tennis court chhunga hun hman hi nuam ka ti ber mai. A tir lamah tih fuh loh deuh ka nei a nih pawhin insiamṭha leh turin beiseina ka nei ṭhin a, chu chuan rah ṭha a siam chhuak a ni," tiin a sawi.

Hmeichhe tennis ranking sang zual pariatte hi group pahnihah ṭhenhran an ni a, group match bika an inkhelh kual hnuah a sang zual pahnih ve ve ten semifinal a lut ang. Semifinal aṭang chuan knock out hmanga inelna neih a ni dawn.