Norwich boss thar tur Smith

Premier League club talbuai Norwich City chuan an coach ban tak Daniel Farke hmun ruak luah turin Dean Smith chu an lalut hnai a, he thuziak i chhiar meuh chuan an inlalut fel tawh hial ang.

Norwich hi Chelsea legend Frank Lampard nen pawh sawizawm an ni a, inbiakna pawh kalpui mah se Lampard a inhnukdawk a, Canaries hian Smith lam an hawi ta a ni.

November 7-a Aston Villa-in an ban tak Smith hi Villa lama a assistant Craig Shakespeare chuan a zui tura ngaih a ni a, Premier League club mawngphah luahtu team hi khaichhuah an tum ang.

Kum 50 mi Smith hian October 2018 khan Villa a enkawl ṭan a, a season hmasa berah Premier League khel turin a hruai thleng nghal. 2019-20 season-ah Carabao Cup final a luhpui a, season hmasa khan Premier League-ah 11-na a nihpui bawk.

Mahse, tun season-ah beisei a phak lo. Villa-in an ban hma hian a league match hnuhnung pangaah a tlawm a, league match 11 aṭanga point 10 neiin table-ah 16-na an ni mek bawk. Rangers boss Steven Gerrard chuan Villa-a Smith hmun ruak hi a luah thung a, thawm a nei ring hle.