Netherlands-in hun ṭha an bawhpelh

Louis van Gaal-a kaihhruai Netherlands-in Montenegro lakah 2-0 in hma an hruai a, FIFA World Cup khel turin an goal neih hum chiah an mamawh. Amaherawhchu mualneitu Montenegro-in an sipurh an sut zo a, 2-2 a an inhnehtawk avangin Oranje-in Qatar zin turin match hautak an khel leh a ṭul ang.

Podgorica City Stadium-ah Netherlands an vannei a, minute 25-naah penalty hmuin Memphis Depay-a'n goal-ah a chantir. Barcelona forward Depay hian minute 54-naah goal hnihna a khung leh bawk.

Montenegro hi goal hnihin hnufual mah se goal khung chance ṭha an nei ve tho a, penalty awm takah pek an ni lo. Hun tawp hnaiah mualneituin goal an khung a, minute 82-naah Oranje tlarhnung ṭhiatin Ilija Vukotic-a'n siphurh sut ṭhenna goal a khung.

Netherlands an insiamṭhat hmain mual vei lam aṭang bawkin Montenegro-in an nawr a, minute 86-naah Nikola Vujnovic-a'n siphurh sutna goal a tauh lut.

Inkhel dangah Turkey-in World Cup khelh beiseina chhi nung turin Gibraltar 6-0 in an sawp a, Norway erawh Latvia nen goal awm loin an inhnehtawk. Norwegian coach Stale Solbakken-a'n inkhel pawimawhah goal khungtu ropui Erling Haaland inhliam vangin a chhawr thei lo.

Group G-ah Netherlands-in point 20 hmuin hmahruaitu an ni a, an hnuaia awm Turkey leh Norway ten point 18 ve ve an hmu. November 16, Thawhlehni zan hian match tawp ber khelh a ni dawn a, Oranje-in Norway an mikhual dawn a, Turkey-in khualmualah Montenegro an hmachhawn thung ang.