Bale 100; Wales 5

Gareth Bale-a'n ram tana a match 100-na a khel a, a ṭhianten Real Madrid forward tana zan chhinchhiah tlak hi lawmpuiin an mikhual Belarus chu 5-1 in an sawp.

Wales tan Aaron Ramsey chuan minute hnihna lekah goal hmahruai a khung a, minute 50-naah penalty hmangin a khung bawk.

Mualneitu team tan Neco Williams, Ben Davies leh Connor Roberts te chuan goal khat ṭheuh an khung bawk a, hun tawp nan minute thum chauh a awm tawh tiha Artem Kontsevoi goal khung chu Belarus tan mualpho zualpui khuhna chauh a ni.

Kum 32 mi Bale hi hliam vanga thla hnih zet chawl tawh a nih avangin second half-ah lakchhuah a ni a, ram tan match 100-a khelhah goal 36 khungin assist vawi 21 a nei - Belarus lakah pawh Neco khung hi a siamsak hman.

Group B-a awm Wales hian Belgium an phak theih tawh loh avangin automatic chuan World Cup an khel thei dawn lo a, mahse, nikum Nations League-a an group-a pakhatna an nih avangin playoff an khel dawn chiang - Thawhlehni zan dar 1:15-a Belgium nen an inhnehtawk chuan an group-ah pahnihna an ni chiang bawk ang.