Italy player pathum an hliam belh

Roberto Mancini tan luhaina tham a ni ta. Euro 2020 champion Italy hian hliam vangin player chhawr theih loh an ngah, pali an inhnuhdawh hnuah pathum dangin hliam leh mimal buaina vangin match an khel thei dawn lo.

Italy hian World Cup qualifier khel turin zanin dar 1:15 hian Northern Ireland an zin chilh dawn. Azzurri tan midang result ngaichang loa tlang tur chuan chak a ngai, an khingpui tur erawh playoff pawh beisei phak tawh lo an ni thung.

Alessandro Bastoni leh Davide Calabria te an hliam a, defender Cristiano Biraghi chuan chhungkaw lamah buaina a nei. Anni pathum hma hian defender Giorgio Chiellini, forward Ciro Immobile, midfielder pahnih Nicolo Zaniolo leh Lorenzo Pellegrini te an inhnukdawk tawh bawk.

An match hnuhnung zawkah Italy hian an mikhual Switzerland chu 1-1 in an inhnehtawk pui, hun tawp dawnah Jorginho chuan penalty a hlah - chak ni se chuan khelh hmabak nei chungin an tling ang, tunah chuan chetsual thiang lo dinhmunah an ding ta.

Group C inkhel dangah Switzerland chuan Bulgaria an mikhual thung dawn. Swiss team hian World Cup ticket nei tur beisei an la nei a, mahse Italy an chak chuan playoff an khelh a ngai dawn a, kalkawng a hla leh sawt dawn tihna a ni.