Kiko-a'n Kid Galahad a knockout

Kid Galahad chuan August 2021-a IBF featherweight title a hlawhchhuah hnua a vawi khat nan a title humhim tum mah se a tlawm nghal a, Kiko Martínez chuan inhnek hmuhnawmah round rukna lekah a knockout.

Kum 31 mi Galahad hian a seilenna khawpui Sheffiled-a Utilita Arena-ah inhnek hi a hmachhawn a, a tir lam round li chu a thunun hneh viau. Mahse, round nganaah Martinez-a'n a kut ding lamin Galahad a deng fuh a, ngai a awh leh tawh lo.

Round rukna, second rukna lekah inhnek hi tihtawp a ni a, kum 35 mi Martinez-a'n vawi 55 fight-a hmachhawna vawi 43-na ni turin hnehna a chang - vawi 10 a tlawm tawh a, vawi hnih draw a nei thung.

Boxing promoter Eddie Hearn chuan, "Ka thil hmuh kha ka awih thei lo hial zawk a ni. Boxing ring chhunga ka thil hmuh tawh a zawnga ropui ber a ni hial ang. Kid khan inhnek a thunun hneh em em a, kawng tinrengah a chungnung zawk a ni ber. Mahse, vawi khat hnekchhuah khan engkim a thlak danglam vek.

"Kiko hian kum 15 chhung professional boxing a chamchilh tawh a, tlawm mai a tum lo ang ka chiang. Galahad khan inhnek a thunun hneh em em a, mahse, a kut ding lama a hnekchhuah khan engkim a thlak danglam ta a ni," tiin a sawi.