Barcelona-ah Alves a kir

Dani Alves chuan ropui taka a lo khelh tawhna Barcelona a pan leh ta. Brazilian defender hi kum 38 mi a ni tawh a, tunah hian club nei loa a awm mek avangin free transfer hmangin Catalan club hi a zawm.

Barcelona manager thar Xavi Hernandez-a'n player a nih laia a khelh pui hi Alves hi a player lakluh hmasak ber a ni a, tun season chhung daih inremna hi an ziak, khelmual chhung leh pawnah a tawnhriat hi an chhawr ṭangkai ang.

Alves hian 2008-2016 chhung khan Barcelona tan a lo khel tawh ṭhin. La Liga nomawi vawi ruk a chawi a, inelna lian Champions League-ah pawh vawi thum a champion a, Copa del Rey pawh vawi li a chawi bawk.

Spanish club lian chuan thuchhuah siamin, "Dani Alves hi Barcelona tan chuan right back ropui ber a ni a, team training pawh a zawm nghal ang. Mahse, nakkum Janaury thla hma chuan a inkhel thei rih lo ang," an ti, tunkar aṭangin team training a zawm dawn tihna a ni.

Barcelona a chhuahsan hnuah Juventus leh Paris St-Germain ten a khel zui a, a kalna lam apiangah nomawi a chawi zel. Tokyo 2020-ah khan Brazil tan captain armband hreng chungin gold medal an hlawh chhuak.

An ram club Sao Paulo tana a hun hnuhnung a hmang dawn niin a lang hman, mahse hlawh chungchangah an inrem loh avangin September thla khan a contract an ti tawp a, club nei loa a awm hnuah Barcelona nen an inrem leh ta zawk a ni.