T20 World Cup champion Australia

Australia-in Pathianni zan khan Dubai-ah New Zealand chu wicket riatin an hneh a, a vawi khat nan T20 World Cup-ah an champion. Aussies tan hian Mitchell Marsh-a'n 77 runs zet a siam a, nomawi an chawi theihna kawngah a ṭangkai hle.

Aussies batter David Warner-a'n tun inlenaah 289 runs a siam a, final-ah ball 38 lekah 53 runs siam bawkin player of the series-ah an thlang. Australia hian a vawi khat nan T20 World Cup champion chauh mah se World Cup (ODI)-ah vawi nga nomawi an chawi tawh a, inelna lianah an record a ṭha lawr lak.

Ṭhumvawr
Semifinal-ah ṭhumvawra hnehna changin vawm hmasak an thlang a, hnehna a chang ve ve. New Zealand leh Australia te hian an target 177 leh 167 te chu over khat dah bangin an umpha thei a, vuak hnuhnung a pawimawhzia a lang.

Final-ah pawh ṭhumvawr a pawimawh a, Australia an vannei zawk a, vawm hmasak an thlang. Ṭhumvawr vangin Aaron Finch-a hote an dinhmun a ṭha zawkah a ngaih theih a, chutihrualin inelna lianah Aussies hi Black Caps lakah an record a ṭha hrim hrim bawk.

Captain Williamson
New Zealand tan Daryl Mitchell leh Martin Guptill ten bul an ṭan chhe lo a, over 3.4-ah 28 runs an siam tawh. Amaherawhchu semifinal-a che ṭha fal Mitchell-a'n 11 runs chauh a siam tihin a thi.

Kane Williamson a rawn lut a, Black Caps hian fimkhur takin bul a ṭan a, a insiamrem hnuah erawh kil tinah ball a vaw thlawk. Kum 31 mi Williamson hian ball 48-ah 85 runs a siam a, pavillion a pan hian 2.1 overs la awmin Black Caps-in 148/4 runs an siam.

Jimmy Neesham (13 runs) leh Tim Seifert (8) te a tawp an rawn khar a, New Zealand-in over 20-ah 172/4 runs an siam. Black Caps hi ti ṭha thawkhat mah se semifinal aṭanga teh chuan a ṭha tawk lo a, Australia buk a rit ta zawk.

Warner leh Marsh
Australia captain Aaron Finch-a'n 5 runs chauh siam mah se New Zealand bowler-te lakah David Warner leh Mitchell Marsh te inkawp an talbuai duh lo. IPL club Sunrisers Hyderabad-in team aṭanga an paih Warner hian inelna ṭha tak a hmang a, final-ah ball 38 lekah 53 runs a siam.

Marsh-a'n a ball hmachhawn hmasak berah six runs a vaw nghal a, a hnu lam chu a dik zuih a ni ber. Kum 31 mi Marsh hian thi loin 77 runs a siam a, T20 career-a runs a siam tam ber ṭum a ni. Inelna ṭan hmaa champion rinkai ni pha lo Australia tan a hun takah Marsh a che ṭha a, final-ah man of the match-ah an thlang.

Over 18.5-ah Tim Southee ball vawm chu Glen Maxwell-a'n four vuak nan a hmang a, Australia player-ten champion an lawm zui nghal. Finch leh a hoten final-ah harsatna an tawk lo a, kawng engkima chungnung zawkin hnehna an chang.

Kar ruk hun duhawm tak kan hmang a, ka teammate-te hi ka hmangaih a, khawvelah kan champion. Theihtawp chhuah turin khelmualah ka lut a, ka beisei phak bak a ni.
- Mitchell Marsh, Player of the match

T20 World Cup Australia team captain ka ni thei hi ka inchhuang hle.
- Australia captain Aaron Finch

Inkhelh hmuhnawm chhawp kan duh a, ka phur hle. Kan target um tur kha a sang a, a zamawm deuhin lang mah se kan khel ṭhat zarah kan umpha thei a ni.
- Australia opener David Warner

Run kha kan siam hnem ve thaw khatah kan ngai a, amaherawhchu Australia kha an che ṭha em a ni. Insiamremna hun min pe lo a, kan khingpuite an fakawm. Ka naute theihtawp an chhuah avangin ka chhuang a, amaherawhchu kan theihna zawng zawng hi nomawi chawi nan a la tawk lo a ni.
- New Zealand captain Kane Williamson