India captain tur Lalremsiami

Mizo nula Lalremsiami Hmar chu FIH Junior World Cup neih turah India captain a ni dawn. Remsiami bakah hian Marina Lalramnghaki, Kawnpui chu India aiawh tura thlan chhuah player 18 zingah a tel bawk.

Kolasib nula Remsiami chuan, "Ka huphurh hran lo. Pathian zarah ka hlen chhuak thei ang, tun hma aṭanga min ṭawngṭaipui ṭhintu Mizo mipui ten min thlawp tih kan hriat avangin kan zam lo," tiin Vanglaini a hrilh a, a ṭhiannu Marina-i nen World Cup khelh an châk tawh.

Tokyo 2020-ah khan Remsiami hi a lo feh chhuak tawh, tun hma deuhin Youth Olympic-ah khan India vice captain a lo ni tawh. Tawnhriat a neih ṭhat avangin India player dangte zinga hruaitu a ni tur pawh hi a ngaihtuahawm hran lo.

Thenzawl Hockey Training Center aṭang hian India team tana khel phak an lo awm nual tawh. Forward Remsiami leh a ṭhiannu defender Marina te pawh hi Thenzawl aṭanga inzir chhuak an ni a, hmabak pawh an nei êng hle.

Junior World Cup hi kum 21 hnuai lam inelna a ni. Remsiami bakah hian senior team tana khel tawh Salima Tete leh Sharmila Devi te pawh an inlan dawn a, senior team tana khel phak pathum awm zingah Mizo nula hi captain atana thlan a ni.

India hi pool C-ah Argentina, Japan leh Russia te nen an awm. An inkhelh kual hnuah group pakhat aṭang hian team pahnih an tlang dawn a, quarterfinal an lut ang. Ram ṭha zual 16 inelna a nih dawn avangin match zawng zawng hi harsa vek turah a ngaih theih.

December 5-16 chhungin Junior World Cup hi Potchefstroom, South Africa-ah khelh a ni dawn. India team hian an match hmasa ber atan December 7 hian Argentina an hmachhawn ang, chumi hnuah Japan leh Russia nen an inkhel leh dawn a ni.

India coach Janneke Schopman chuan, "Player koh chhin 28 kha an ṭha em em vek a, theihtawp an chhuah vek bawk avangin mi 18 thlan chhuah pawh hi a harsa hle," tiin a sawi.

Remsiami leh Marina-i bakah hian forward Lalrindiki leh keeper F. Ramenmawii te pawh India camp-ah an awm a, mahse World Cup khel tura thlan zingah an tel phak rih ta lo a ni. Chutihrualin Didiki leh F-i te hi India junior team tan chuan an feh chhuak fo tawh.