Hamilton-a tan Tih theih loh a awm lo

Dan a bawhchhiat avangin an hrem a, a hmaah driver ṭha tak tak tlan chhuak hmasa mah se Lewis Hamilton chuan huaisen takin Sao Paulo Grand Prix-ah hnehna a chang - Formula 1 champion lai hian a nomawi humhim thei turin beisei a nei chhunzawm.

Hnehna a chan hnuah Hamilton chuan tumna a awm chuan eng pawh tih theih loh a awm loh thu a sawi, inelna a hmachhawn dan chhut chuan a thusawi leh a chet dan hi a in mil hle; a tawp hma chuan Mercedes driver hi a beidawng ve ngai lo.

Hnehna chu
Qualifying-ah Hamilton hian a car hnung lama boruak tih chhuahna chu dan phal baka zauin a hawng, hei hian car tlan a tih chak avangin dan kalh a ni; 10-na aṭangin intlansiak bul ṭan tura tih a ni.

Championship lama hmahruaitu Max Verstappen pawhin a elpui Hamilton car hi ṭul lo taka a lo belhchian ve ngawt avangin hrem a ni a, pawisa chawitir a ni thung. Intlansiak ṭan hma aṭangin boruak a sang nghal hle.

Autodromo Jose Carlos Pace-a intlansiakah kawng kawi hmasa ber aṭangin a hmuhnawm nghal a, a tawp thlengin a hmuhnawm tluan chhuak zak. Hamilton leh Verstappen ten hma an in hruai chhawk zak zak.

Hun pawimawh laiah Hamilton bawk a rawn langsar. Lap 12 tlan hmabak an a neih aṭangin hma a rawn hruai leh, a tawp thlenga chungnung zuiin hnehna a chang. Championship lama a elpui Max-a chu pahnihnaah a thleng thung.

A la tawp lo
Season kal laiah Red Bull driver Verstappen hi hnehna chang hnem ber a ni a, vawi kua a chak tawh. Kum an hman dan thlir chuan champion phu ber tia sawi ngam a ni, mahse vawi ruk chak tawh Hamilton hi a la tlawm lo.

Mercedes driver Hamilton chuan, "Inelna ka hmachhawn ve tawhah chuan chona san ber ṭum a ni hial ang. Thil thleng zawng zawng avang khan chona a sang a, car khalh chungchangah chuan ka khalh ṭhat ber ṭum a nih ka ring," tiin a sawi.

Britain tlangval hian F1 title hi vawi sarih a la tawh a, record nei ṭha ber Michael Schumacher nen an in nihrual mek. Kuminah hian record siam ngei a tum a, a elpui Max a ṭhat ve em avangin a hautak hle - intlansiak hmabak pathum chauh an nei tawh.

Qatar, Saudi Arabia leh Abu Dhabi-ah te inelna an la nei dawn. Tuna Hamilton-a'n Verstappen a phak lohna hi point 14 a la ni a, an inkar a la zau viau. Chutihrualin intlansiak pakhatah point 25 a hmuh theih miau a, engkim a la danglam dawrh thei.