World Cup-ah RONALDO a tel dawn em?

Khawvela football inelna ngaihhlut ber FIFA World Cup 2022-ah footballer ropui zinga mi Cristiano Ronaldo chu khel lo thei dinhmunah a ding.

Pathianni zan khan Portugal-in an mikhual Serbia 2-1 in an hneh lo. Group A-ah Serbia hi pakhatna niin World Cup khel turin an tling a, Ronaldo captain-na hnuaia khel team erawh pahnihna niin Qatar-a zin turin playoff paltlang a ṭul ang.

Mitrovic zawk!
Group A match hnu-hnung berah Portugal-in Estadio da Luz-ah Serbia an mikhual a, bul pawh an ṭha. Minute hnihna lekah Bernardo Silva-a'n box bulah Nemanja Gudelj ball chhuhsakin Renato Sanches tan a pe a, Lille midfielder hian goal hmahruai a khung.

Portugal-in goal khung hmasa mah se Serbia-in Fiorentina forward Dusan Vlahovic an kawl avangin nuam sain an awm lo. Mikhual team an vannei zui a, minute 33-naa Dusan Tadic ball pet chu keeper Rui Patrício-a'n dang sualin goal-ah a lut.

Mualneitu lamin goal an beisei a, Ronaldo-a'n goal a khungsak thei lo. Chutihrualin Portugal tan World Cup khel turin draw a tawk a, an tling tho turah a ngaih theih.

Amaherawhchu, sub-stitute Aleksandr Mitrovic-a'n danglamna a rawn thlen. Fulham striker Mitrovic hian minute 90-naah Tadic-a cross chu a tauh lut a, Portugal tan sut ngaihna a awm tawh lo.

Ronaldo leh mittui
Cristiano Ronaldo-a'n kum 36 a tling tawh a, nakkum World Cup bak hi hun a nei tawh kher lo ang. Manchester United forward hi Qatar-a zin thei lo thei dinhmuna a din lai hian Lionel Messi telna Argentina erawh World Cup khel turin an tling ngei dawn.

Serbia laka an chak loh zawhah Ronaldo hi khelmualah a ṭhu nghal a, World Cup an la tlin loh avangin a mittui a tla hial. Ram leh ram inelnaa pet goal tam ber Ronaldo hian football chanchin duhawm tak nei tawh mah se a tawp khar dan hi zui ve thei tlat.

Portugal squad hi a chhah ṭha a, playoff-ah pawh seeded number 1 an nih dawn avangin tling tura rinkai an la ni tho. Playoff-ah hian ram 12-in hmun ruak pathum an inchuh dawn a, hmun thumah pali zela ṭhenin knockout hmanga inkhelh tur a nih avangin ram ṭha ta pawh vanduai theih a ni ang.