Ropui takin Rossi a herliam

Mipui an awm hle hle thei lo, intlansiak chhung zawngin a sir entute chu an phusa a ni ber mai, lawmna leh hlimna phenah chuan lungngaihna leh lunglenna hmel hmuh tur an awm tel bawk - heng mite hi Valentino Rossi intlansiak hnuhnung ber entute an ni.

Bike intlansiak huanga hming dai tawh ngai lo tur Rossi-a'n MotoGP bike a khalh hnuhnung ber lai hi mipui 75,000 chuangin a hmunah an en; TV leh internet aṭangin maktaduai telin an en bawk. Italian rider hian kum 25 chhung a luhchilh tawh bike intlansiak chu a mangṭha ta.

A her liam ta
Pathianni zan khan Circuit Ricardo Tormo-ah Valencian Grand Prix tlan a ni a, kum 42 mi Rossi tan a hun hnuhnung ber a ni. Qualifying lama a chet ṭhat tawk loh avangin 10-na aṭangin an tlan ṭan a, a bul ṭanna angah bawk hian hnu a khar.

Yamaha rider hian lap hnuhnung ber a rawn tlan laiin entu mipui chu amah zahna lantir nan an lo ding a, a team Yamaha chuan meikhu leh halmawi hrang hrang an lo ti chhuak bawk. Hmun tiam a tlan thlen lai phei chuan mipui thawm a ṭha vet vet hle.

Intlansiak a zo a, a elpui rider te chu rawn kal khawmin Rossi hi lawmpuina an hlan liam liam, atan hun hnuhnung a nih miau avangin a ṭhiante hian chawisangin ropui takin an thlah, rider ṭhenkhat tan chuan an 'Idol' kha a ni miau a, ropui taka an thlah hi thil mak a ni hran lo.

Thlahna thu
Infiamna peng hrang hrangah mi bik an awm, bike intlansiakna huangah chuan Rossi aia chungnung leh langsar sawi tur a awm bik lo. Brazil rama intlansiakna an neihah pawh hian mihrang hrangin Rossi hi an thlah - an zingah hian Brazilian legend Ronaldo pawh a tel.

Brazil striker ropui Ronaldo hian 'Rossi 45' tih chuanna leh 'Ronaldo' tih inziahna jersey nen Rossi hi a thlah a, infiammi ropui pahnih hi a taka an inhmuh hmasak aṭanga kum 20 liam hnuah an inhmu leh chiah - Milan khawpuia an inhmuh leh Spain boruak inkar a hla hle.

Video kaltlangin tennis player ropui Roger Federer leh Rafael Nadal ten Rossi chungchang an sawi, anni bakah hian Hollywood actor pahnih Tom Cruise leh Keanu Reeves te thusawi chu screen-ah tarlan a ni bawk.

Rossi tan a hlan
Valencian Grand Prix-ah hian Francesco Bagnaia-a'n hnehna a chang. Bagnaia hnungah hian amah ang bawka Ducati bike khalhtu Jorge Martin leh Jack Miller te an thleng; bike intlansiakna sang berah Ducati hian ṭum khata pakhatna aṭanga pathumna an hauh hmasak ber ṭum a ni.

Hnena changtu Bagnaia chuan, "Hnehna ka chan hi Valentino tan a ni. Kei leh midang tana a hnathawhte avangin a chungah lawmthu ka sawi a, ka tih ve theih tawk chu ka hnehna chan atana hlan hi a ni," tiin a sawi.

Kum 24 mi Bagnaia hi VR46 academy aṭanga inzir chhuak a ni a, academy neitu chu Rossi hi a ni. An kum chhut chuan Bagnaia pian hma kum khat la awmah Rossi hian bike intlansiak khawvel a luhchilh tawh, an inthlau rem rem hle.

Mangṭha, ‘The Doctor’
Italy ramah chuan mi chhuanawm leh ngaihsanawm bikte hi an zahzia lantir nan 'Doctor' tih hminglem an pe ṭhin a, bike intlansiak hmanga an ram ti hmingṭhatu leh chawimawitu a nih avangin Valentino Rossi koh nana an hmang pawh hi a mak lo.

A thil tih avangin Rossi hian degree pawh a hlawh chhuak a, heng pahnih hi 'The Doctor' tia an sawi chhan a ni. Bike intlansiakna hrang hrangah vawi kua ngawt world champion a ni a, inelna sang berah vawi sarih ngawt a champion avangin a hming lem hi a inhmeh hle.

Kum 42 mi Rossi chuan, "Intlansiak ka hmachhawn hnuhnung berah chuan 10-na nih phak ka tum ang tih kha ka rilruah a awm ṭhin, ka duh ang ngeiin ka thleng thei, a hnung bera awm chunga hun tawp hman chu ka duh lo.

"Hetiang em em hian min thlahtu an awm ang tih hi ka ring phak lo, hetiang hun hi a lo thleng dawn tih hre lawk mah ila a taka a lo thlen meuh chuan a mak duh ngei mai, engkim mai kha ka duh leh beisei aia ṭha vek a ni," tiin a sawi.

Rossi hian 125cc, 250cc, 500cc leh MotoGP huangah nomawi a chawi a, rider dang zingah hetiang ti thei hi an awm ve lo. Season thar aṭang chuan Rossi-a team VR46 chu MotoGP-ah a vawi khat nan an inlan tawh dawn.

Italian rider Rossi chuan, "A khawhar thlak dawn, ni leh thla a liam anga, a khawhar thlak telh telh ngei ang. Theih ni se la chuan world champion hi vawi 10 nih ka chak, mahse engkim mai hian thlen chin leh tawp chin a nei tih kan hriat a ngai," tiin a sawi.

Ngaihnawm
• Valentino Rossi hian Grand Prix 432 a hmachhawn, kum 1946 aṭanga khan world championship neih ṭan niin intlansiak vawi 975 a awm tawh. Rossi hi 44.2% velah a inlan tihna a ni.
• Rossi hian inelna hrang hrangah team hran hran tan hlawhtlinna a chang - 125cc Aprilia, 250cc Aprilia, 500cc Honda, 990cc Honda, 990cc Yamaha, 800cc Yamaha leh 1000cc Yamaha te a hlawhtlinpui vek.
• Yamaha rider zinga hlawhtling ber a ni a, Yamaha bike khalh chung hian vawi 56 zet hnehna a chang.
• Bike intlansiakna sang berah vawi 89 hnehna a chang a, chak hnem ber a ni.