World Cup khel tur Spain
Spain-in nakkuma World Cup khel turin qualifier match hnuhnung berah point khat hmuh an mamawh a, an mamawh aia tam an hmu - World Cup 2022 khel turin an tling.
La Roja hian an mikhual Sweden chu 1-0 in an hneh a, inkhela goal awmchhun hi minute 86-naa Alvaro Morata khung a ni a, group B hmahruaitu an ni chiang.
Chak mamawh Sweden-in goal an khung theih loh avangin an mamawh zat point thum an hawn thei lo a, World Cup ticket nei turin playoff an nghah leh phawt a ngai dawn tihna a ni.
Playoff hi nakkum March-ah khelh a ni dawn a, Sweden hian nakkum World Cup an khelh dawn leh dawn loh hre lo chungin Krismas chu an hman leh phawt a ngai.
Dinhmun danglam
Tun international break neih a nih hma khan Sweden-in group B-ah hma an hruai a, an hnuai chiaha awm Spain nen match hnih ve ve khelh tur la nei chungin point hnihin an sang zawk.
Sweden hmabakah Georgia an awm tel bawk avangin Zlatan Ibrahimovic telna Sweden dinhmun a ṭha takzet a, Spain-in an match hnuhnung pahnihah chak ve ve an mamawh niin a lang hman.
Mahse, football mawina phochhuahin a awm. Spain-in 1-0 a Greece an hneh laiin team naran Georgia lakah 2-0 in Sweden an tlawm thung - Georgia hi FIFA ranking-a 93-na an ni!
Pathianni zana an intawn dawn meuh chuan Spain-in point khat chiah an mamawh a, Sweden-in chak ngei ngei an mamawh ta thung a, thil a inthlak danglam chiang hle.
Spain an thiam
Luis Enrique enkawl Spain-in dan pangngaiin ball an chang hnem a, 72% zet minute 90 chhungin ball an chang thei! La Roja hian bul pawh an ṭan ṭha zawk a, Greece laka penalty chhuih luttu winger Pablo Sarabia chuan chance duhawm a hlah.
Sweden-in ball chang tam lo mah se an khel ṭha tawlh tawlh a, an ball chan chhunah an hlauhawm thei hle. RB Leipzig forward Emil Forsberg chuan chance duhawm vawi hnih a hlah a, Alexander Isak-a'n khung ngeina tura ngaihah a khung lo bawk.
Hun tawp nan minute li chiah a awm tawh a, goal awm loa inkhel a tawp chuan Spain chu tlang tur an ni. Dinhmun ṭha zawk Spain-in an dinhmun an siam ṭhat belhchhah a, Morata chuan goal a rawn khung.
Sweden goalkeeper Robin Olsen chuan Dani Olmo shot chu dang mah se bar a per a, a per lehlam hi Juventus forward Morata chuan harsatna nei loin goal-ah a chantir a, Spain-in hnehna changin World Cup khel turin an tling.
Squad a chhah
Barcelona leh Real Madrid te tun hma angin an ropui tawk tawh lo a, hei vang hian Spain team-ah pawh club pahnih aṭangin player an tlem - Madrid phei chuan an thawh lo hrim hrim!
Hetiang boruak avang hian Spain-in tun hma angin ngaihven an hlawh tawk lo a, an thiam an la theihnghilh lohzia erawh chiang takin a lang nawn. Kum 1974 hnuah Spain hi World Cup khel turin an la tling char char.
Tun international break-ah pawh hliam vangin forward ṭha ṭhiau Ansu Fati, Gerard Moreno, Yeremi Pino leh Mikel Oyarzabal te chu Enrique-a'n a chhawr thei lo a, mahse an buai phah lo tih pholangtu chu an result a ni.
Sweden laka an game pawimawhah pawh Enrique-a'n huaisen takin ram tana a vawi hnih nana inlan chauh Raúl de Tomás a ring ngam a, Espanyol striker hian tun season La Liga match 12 aṭangin goal sarih a khung tawh.