Croatia-in Qatar ticket an nei ta

Russia-in nakkuma World Cup khel turin Croatia lakah point khat hmuh chiah an mamawh a, a tawpah kut ruakin an haw thung - Croatia-in World Cup an khel dawn a, Russia tan playoff nghah a ngai ta thung.

Croatia khelmualah Russia-in Qatar panna ticket nei turin minute kua chiah ṭan an mamawh tawh a, a tawp thleng an ṭang zo ta lo - minute 81-naah Fedor Kudryashov chuan an lamah a ti lut!

Turkish club Antalyaspor centre back Kudryashov hian Croatia left-back Borna Sosa -a cross aṭanga ball kal chu an lamah a ti lut palh a, rei tak chu zan mut a nuam lo ang.

Mikhual team Russia hian playoff an paltlang zawh loh phei chuan Pathianni zan thil thleng hi an thlirkir ang a, an ui vawng vawng ang.

Goal an chhuah hnuah pawh Russia hian chance dang an la nei cheu. Mahse, Zenit St. Petersburg right back Vyacheslav Karavayev chuan minute 90-naah an chance neih hi goal chungah a thlawh a, an mamawh zat point khat hlawhchhuahna remchang a khawhral.

Inkhel pumpui thlir chuan Croatia hian tlang an phu zawk hrim hrim - vawi 19 zet shot neiin target-ah vawi nga shot an nei a, Russia hian vawi hnih chiah shot an nei ve thung!

Russia tan goalkeeper Matvei Safonov a chet ṭhat bakah khelmual ṭha tawk loin a pui tel a, Andrej Kramaric, Marcelo Brozovic, Mario Pasalic, Bruno Petkovic leh Josip Juranovic ten Croatia tan an hun ṭha an chhawr thei lo vek.