Japan tan chak a ṭul

Asia aṭanga World Cup khel tur zawnnaah Japan dinhmun a ṭha lo a, Blue Samurai tan Qatar-a zin turin zanin dar 9:30-ah Oman an hneh ngei a ṭul.

Asian Football Confederation hnuaiah ram 46 an inziaklut a, World Cup khel tur zawnnaah hian round hnih khelh tawh niin third round-a hian team 12 chiah an dam tawh. Ram 12 hi group pahnihah paruk ve ve a ṭhen darh niin a sang pahnih ve vein World Cup an khel dawn.

Pathumnaa awm team pahnih ten fourth round an khel leh ang a, inter continental playoff khel tur an zawng ang. Group A aṭangin Iran leh South Korea te World Cup khel turin an dinhmun a ṭha a, playoff khel tur erawh hriatthiam a la har. Group B-ah Saudi Arabia-in point 13 hmuin hma an hruai a, Australia (10 pts) leh Japan (9) te an hnuaiah an awm. A sang pathuma awm ramte hi an la inkhelh vek dawn avangin tling tur hriatthiam la har hle.