Norwich coach thar Smith

Premier League mawngphah luahtu Norwich City chuan Daniel Farke an ban hnuah an coach atan Dean Smith an lalut chiang ta a, kum hnih leh a chanve cham turin contract hi a ziak.

November 7 khan Aston Villa chuan league match nga chhung a zawna an tlawm hnuin Smith hi a hna aṭangin an chawlhtir a, a thlak turin Rangers boss Steven Gerrard an lalut fel tawh.

Mahse, Villa duh loh hi Norwich chuan an iai lo a, an club enkawl turin Smith an lalut. Villa Park lama Smith-a assistant Craig Shakespeare chuan a pu hi Carrow Road lamah pawh a zui a, assistant coach hna a chelh ve dawn bawk.

Norwich hi Chelsea legend Frank Lampard nen pawh sawizawm an ni a, inbiakna pawh kalpui mah se Lampard a inhnukdawk a, Canaries hian Smith lamah an insawrbing ta a ni.

Kum 50 mi Smith chuan, "Tun hnai ni sarih chu thil a inlumlet nasa takzet. Premier League-ah kir a, Norwich City tana hna ka thawk thei tur hi ka lawm takzet.

"Tun hnai kum li leh a chanve chhunga he club-a thil thleng leh hnathawhte hi a ropui takzet. Tunah chuan Craig nen chu hnathawh ṭha tak chu chhunzawm a, hmasawn lehzual tura beih chu kan hna a ni ta a, Premier League-a inhamtan chu kan thupui tur a ni ang," a ti.

Smith hian October 2018 khan Villa a enkawl ṭan a, a season hmasa berah Premier League khel turin a hruai thleng nghal. 2019-20 season-ah Carabao Cup final a luhpui a, season hmasa khan Premier League-ah 11-na a nihpui bawk.

Mahse, tun season-ah beisei a phak lo. Villa-in an ban hma hian a league match hnuhnung pangaah a tlawm a, league match 11 aṭanga point 10 neiin table-ah 16-na an ni mek bawk - league match 11 khelha point nga neitu Canaries (Norwich sawina) a kaihhruai dan tur hi hmuh a châkawm ta hle.

Norwich hian Smith hnuaia an match hmasa berah Inrinni zan dar 8:30 hian Southampton an mikhual dawn a, English coach hi Premier League-a club hran match zawna enkawl hmasa ber a ni dawn. Villa-in an ban khan international break a nih zui avangin Premier League match a awm lo a ni.