European champion-in playoff an khel dawn ; World Cup kan khel ang a, kan champion hial ang - Mancini

World Cup khel tur zingah Cristiano Ronaldo telna Portugal an la tel thei lo a, Euro 2020 champion Italy meuh pawh an la tling zo bik lo.

Thawhṭanni zan khan Azzurri hi Northern Ireland nen goal awm loin an inhnehtawk a, group C inkhel dangah Switzerland-in Bulgaria 4-0 a sawpin Qatar an zin thung dawn.

A hot sa
Italy hi group match hnuhnung ber an khelh hmain Switzerland nen 1-1 in an inhnehtawk. Ram pahnih hian point 15 ve ve an hmu a, FIFA hnuai inelna a nih avangin an point a inang a nih chuan goal difference en tur a ni.

European champion hian Belfast-ah Northern Ireland an hmachhawn a, Switzerland hian Lucerne-ah Bulgaria an mikhual thung. Khualmuala khel ni mah se Azzurri goal difference hi 11 a ni a, Swizertland (9) aia a ṭhat hret avangin an dinhmun a thlanawm zawk.

Goal a tam
Group match tawp ber a nih avangin inkhelh hun a inang. Switzerland-in minute 45 chhungin goal an khung thei lo a, halftime-a coach Murat Yakin-a thu ṭha hrilhin second half-ah Switzerland tan danglamna a thlen.

Minute 48-na lekah Xherdan Shaqiri cross chu Noah Okafor-a'n a tauh lut a, minute 57-naah goal dang a lut lehnghal. Tlarhmaa awm player pahnih Ruben Vargas leh Mario Gavranovic te an inthlawp a, Vargas-a'n goal hnihna a khung.

Switzerland dinhmun ṭhatna belhchhah turin Cedric Itten-a'n minute 72-naah a tauh lut a, 3-0 a ni chiah. Mualneitu an phur zel a, minute 90-naah Shaqiri siam bawk chu Remo Freuler-a'n a pet goal a, 4-0 in inkhel a tawp.

Windsor Park-ah Italy-in goal khung pawh ni se Switzerland hi an goal difference a ṭhat tawh zawk avangin ngaih ṭha takin an awm thei tawh a, World Cup khel tura an tlin thu an hriat zui avangin anmahni ṭantu mipui nen an hlawhtlinna chan lawmin an lam nasa hle.

A goal lo
Italy-in hliam vangin Ciro Immobile, Giorgio Chiellini, Lorenzo Pellegrini leh Marco Verratti te an chhawr thei lo chungin chhuanlam neih a thiang lo tih an hria. European champion hian Windsor Park-ah goal an mamawh tih hriain ṭan phat aṭangin an nawr nghal.

Lorenzo Insigne, Federico Chiesa leh Domenico Berardi te hmangin Northern Ireland tlarhnung an rum ṭhaih a, chance pawh insiam bawk mah se first half-ah goal hmuh tur a awm lo.

Second half-ah George Saville hmangin mualneitu lamin chance ṭha an nei a, Gianluigi Donnarumma-a'n Italy team a chhan. Switzerland lamin goal an khung tawh tih hriat avangin World Cup-a inpettling nghal turin goal an mamawh.

Amaherahwchu Berardi leh Chiesa ten goal an khung thei tlat lo a, Northern Ireland zawkin goal khungna chance ṭha an nei zawk. Substitute Conor Washington-a'n keeper Donnarumma a paltlang hnuah Italian defender chauh hmachhawn mah se keeper awm lohna goal-ah a khung thei lo a, captain Leonardo Bonucci-a'n goalline-ah dangin Azzurri mualphona a tih ziaawm phah.

Mancini a inringtawk
Italy hian 2018 World Cup an khel pha lo a, Mancini hnuaiah hartharhna changin kum 2018 hnuah Nations League playoff semifinal-a Spain laka an tlawm bak chak loh an la nei lo a, Euro 2020-ah nomawi an chawi bawk.

Manchester City manager hlui Mancini chuan, "March thlaah World Cup khel turin kan tling ang. Inelna takah pawh kan champion hial thei ang. Ka inringtawk hle," tiin World Cup khel tura an tlin tho tur thu a sawi.

Mancini chuan sawi chhunzawmin, "Inkhel thunun chungin goal khung kan harsat a, match tawp ber nghak loa World Cup khel tura inpet tling thei tur chu kan ni. Bulgaria te kha hneh ngei tur an ni a, Switzerland lakah penalty ṭum hnih kan hmu bawk. Team ṭha zawk ni chungin kan chak ṭhin lo. Chutihrualin playoff-ah erawh ka inringtawk," tiin a sawi.

Azzurri hian World Cup qualifier-ah hneh loh nei lo mah se vawi riat an khelhah ṭum li an chak a, ṭum li ngawt an inhnehtawk.