Lalrina telna India chak chiang

SABA Championship 2021-ah nimin khan India-in an match hmasa ber an khel a, Mizo tlangval Lalrina Renthlei telna India team-in Maldives 88-31 in an sawp.

Tuikhuahtlang tlangval Lalrina hian India aiawha a khelh hmasak berah point guard hna a chelh a, ball semtu atan an hmang tihna ni. MSL lamah chuan Lalrina hian shooting guard leh forward hna te a chelh ṭhin a, a 'technique' a dik avangin point guard-ah pawh hian a ṭha hle.

India hi an chak chian avangin player an siksawi kual a, Lalrina hian a khelh hun chhungin a theihna a pholang hman. MSL-a Zarkawt BCA vawi thum champion pui tawhtu hian minute 20 khelin point hnih a neih bakah assist vawi ruk a nei a, steal vawi nga leh rebounds vawi thum a nei bawk.

Lalrina Renthlei chuan, "India tan vawi khat ka khelhnaah minute 20 ngawt khelhna hun min pe kha ka lawm khawp mai. Coach duhdan angin ka khel thei a, ka khelh danah ka lungawi hle," tiin Vanglaini a hrilh.

SABA Championship-ah hian ram pali India, Sri Lanka, Bangladesh leh Maldives te an tel. Covid-19 leh chhan dang vangin Nepal, Bhutan, Pakistan leh Afghanistan te an tel thei lo. November 15 khan inelna hi ṭan a ni a, match hmasa berah Sri Lanka-in inelna thlengtu Bangladesh 67-56 in an hneh.

India hi tukin zing dar 8:30 hian Sri Lanka nen an inhmachhawn dawn. Inelnaah hian vawi khat inkhelh kuala point hmu sang ber an champion dawn avangin tukin inkhel tur hi champion tur zawnnaah a ngaih theih ang.