Training aiin a hah lo zawk ang - NT-a coach

November 27-ah NT Lalbiakkima'n Mizoram leilunga a vawi khat nan professional boxing a khel dawn a, IBA intercontinental title a kawl lai chu Thai boxer Gerttipong Kumsahwat lakah humhim a tum ang.

Siaha boxer hian he inhnek tur atan hian ngawrh takin training a nei chho mek a, a coach Lalmuanpuia chuan a boxer-in training aiin an inhnek tak tak hunah hahthlak a tih loh zawk a rin thu a sawi!

Mizo boxing coach ṭha Muanpuia chuan, "Round 10 inkhel tura tih an ni a, hemi tlin tur khawp hian fitness a nei ṭha. A hma zawng aiin NT-a hi a ṭha tawh zawk a, kan training aiin inhnek tak tak hunah a hah lo zawk ang," a ti a, a boxer chu awlsam taka a chak theih tur thu Vanglaini a hrilh.

Muanpuia chuan, "A chak lohna laite kan siam ṭha a, hma kan sawn hle. A hma aiin tharum a ngah tawh zawk bawk. NT-a nen hian kan inhrawn rei ve ta a, a tir lama kan duhthusam loh lai, speed leh timing velah pawh hma kan sawn hle," a ti.

NT-a te inhnek hi LPS leh Chhimbal App-ah te pay-per-view hmanga en theih a ni dawn a, LPS pawt remchang lo leh Mizoram pawn lama awm tan Chhimbal-ah hian Rs. 100 + tax (chhiah) chawiin a en theih dawn - heta ṭang hian LPS Fight Night-a inlan tur Mizo boxer-ten 85% an chang ang.

Muanpuia chuan, "NT-a hi mi taima a ni a, kan ruahman ang apiang chu sawisel loa ti mai zel ṭhin a ni a, fitness-ah chuan sawisel bo a ni," tiin a boxer a ringtawk hle.

NT-a coach hian body movement zawha rang taka hnek chhuah theih chu an buaina ṭhin a nih thu a sawi a, "Tunah chuan hei pawh kan siam ṭha viau tawh," a ti a, Muanpuia thusawi a dik leh dik loh November 27 zanah a hriat ang.