Jeje-a'n ISL a khel lo mai thei
Mizo footballer thleng sang ber Jeje Lalpekhlua'n Indian Super League khelh tur atan club a la nei lo a, Hnahthial tlangval chuan ISL a khelh loh mai theih thu Vanglaini a hrilh.
India rama club football inelna sang ber ISL hi Zirtawpni zan hian khelh ṭan a ni tawh dawn a, zan dar 7:30-ah ATK Mohun Bagan leh Kerala Blasters ten match hmasa ber an khel dawn.
Hetiang boruak karah Jeje-a boruak a reh vung vung a, Indian media tam takin Mizo striker hi a kalna tur an inrinsiak - ISL ṭan a hnai tawh si a, football fans tam takin an ring an fân.
Hliam & Jeje
Indian player zinga Sunil Chhetri dawta ISL record nei ṭha bera chhal ngam chu Jeje a ni a, mahse, Hnahthial tlangval hian 2017-18 khan season duhawm tak a hman hnu lawkah hliam a tuar a, a khup hliam hnuah ngai a awh leh tawh lo.
Mizo Sniper hian 2017-18 season-ah hian league match 20 khelin goal kua a khung a, assist vawi khat neiin ISL-ah Chennaiyin a champion pui.
Mahse, Mizo striker hian hliam a nei zui a, 2018-19 season-ah hliam nei chunga match 16 khelin goal khat chiah a khung a, 2019-20 season a chawl tawp a, season hmasa khan East Bengal tan match sarihah goal khat khungin assist vawi khat a nei.
A har a ni
Jeje-a'n hliam dam chiang thei lo nei chungin season hmasa a hmachhawn a, Mizo striker hi a ṭhat dan berin a awm lo tih chu a khelh danah a chiang - Jeje-a'n dam chiang lo chunga ISL hmachhawn a tum tawh lo.
India tan vawi 56 inlana goal 23 khung thei striker chuan, "ISL lamin ka rilru a la luah thei lo. Ka hliam a la dam chiang lo a, club min sawmtu awm ve nual mah se dam chiang lo chunga contract sign ka duh lo a ni," tiin Vanglaini a hrilh.
Thil mak danglam a thleng a nih loh chuan Jeje-a'n ISL season bul a ṭan dawn lo tih a chiang tawh a, season tluana kan hmu ta lo a nih pawhin a mak lo ang.
Apuia a langsar
Mizo chhuanvawr ṭhin Jeje dinhmun la chiang lo mah se Lalengmawia (Apuia) chu Mizo mai ni lo, Indian mipuite tana football khawvela beiseina thar siamtu a ni a, tun season-ah Mumbai City tan a khel dawn.
Vaivakawn tlangval hi Mumbai City chuan ISL player man to ber ni turin vaibelchhe hnih sengin an lalut a, kum nga chhung atan contract a ziak.
India international Apuia chungah mipui mit a fu ang tih a chiang a, NorthEast United tana season duhawm tak hmangtu hian eng ang takin nge a rawn khelh chhuah dawn hriat a châkawm ta.