Federer a la dam thei rih lo

Roger Federer hliam a la dam fel thei rih lo a, season thar tir lamah pawh a hmel kan hmu thei dawn lo niin a lang. Federer-a coach Ivan Ljubicic sawi dan chuan Swiss star hi Australian Open-ah pawh a inlan thei lo ang.

July thla khan Federer hian Wimbledon a khel, a tournament ngainat berah hian quarterfinal a paltlang zo lo. A khup a hliam zui a, zai niin tun thlengin a la inkhel leh thei lo, kum 40 mi ni tawh mah se inkhelh chawlhsan erawh a la tum mai bik lo.

Ljubicic chuan, "Ka hmuh dan chuan Federer tan Australian Open chu a la hma lutuk ang, kum 40 a nih tawh avangin thil hi hmanhmawh taka kalpui theih vek a ni tawh lo. Kan beisei anga rangin a dam fel thei ta lo a ni," a ti.

Chawlh a la tum loh thu sawi zuiin Ljubicic chuan, "Kan inbiakna hnuhnungah chuan chawlh tumna a la nei lo, a theih anga rei inkhelh a duh. A theih loh tawpah chuan a chawl mai ang, chu erawh tun hnai mai a nih a rinawm loh," tiin a sawi bawk.

Grand Slam vawi 20 champion tawh Federer hi Rafael Nadal leh Novak Djokovic te nen major title an lak hnem lam a intluk mek. Player pathum hian inkhelh an la chawlhsan lo vek, record nei ṭha ber nih an duh hlawm avangin inelna hi a la tawp mai dawn lo.

Australian Open khel tur chuan hripui leng laka invenna lak kim a ngai dawn a, world number 1 Novak Djokovic chu a inlan thei ngei dawn em, tih a la chiang lo. Nadal erawhin khelh ngei a tum thu a sawi chiang tawh.