World Cup khel turin goal 10 khungtu England an tling
England-in World Cup khel turin an match hnuhnung berah draw result an mamawh a, an mikhualna ramah San Marino chu 10-0 ngawtin an sawp.
Three Lions tan Harry Kane chuan goal li a khung a, Harry Maguire, Filippo Fabri (own goal), Emile Smith Rowe, Tyrone Mings, Tammy Abraham leh Bukayo Saka ten goal khat ṭheuh an khung bawk.
Smith Rowe leh Mings tan inter-national football-a an goal khung hmasak ber a ni a, Trent Alexander-Arnold chuan assist hattrick a nei bawk. Arsenal keeper Aaron Ramsdale pawhin a vawi khat nan England senior team tan a inlan a, a clean sheet nghal. England an chak nuamsa hle.
England chak laiin Poland chu Hungary lakah 2-1 in an tlawm a, mahse, group I-ah pahnihna erawh an ni ta tho - Qatar an pan theih dawn leh dawn loh hre turin playoff an nghah leh phawt a ngai dawn.
An inthlau
FIFA ranking-ah ram 210 an awm a, San Marino hi 210-na an ni! April 2004 khan Liechtenstein chu 1-0 in an hneh ve mial a, hei hi international match 186 an khelha an chak awmchhun a ni!
San Marino tana goal khung hnem ber Andy Selva-a goal khung zat pawh goal riat chauh a ni a, San Marino player tan chuan Premier League 'star' rual khelhpui hi lawmna tham a tling der tawh.
Ram pahnih dinhmun khaikhinin England hi an chak dawn tih a chiang sa a, chutihrual chuan goal 10 an khung hi kum 1964 hnua Three Lions-in international match-a goal kua aia tam an khung leh hmasak ber a ni a, England result hi sawi nep a rem lo.
England tana player langsar bera chhal ngam Kane-a'n goal li a khung a, goal hnih hi penalty aṭanga a chhuih luh a ni - penalty pakhat chawitu Dante Rossi chu yellow card pahnih a hmuh avangin hnawhchhuah a ni a, mahse, hetihlai hian goal sarih an chhuah fel der tawh.
A hming Kane
Kane-a'n an match hmasa zawkah Albania lakah hattrick a siam a, San Marino laka a siam leh tak avangin Vivian Woodward, Dixie Dean leh Tommy Taylor hnua England tana match zawna hattrick siam leh thei hmasa ber a ni.
Arsenal legend Ian Wright-a'n kum 1993 khan San Marino lakah vek Three Lions jersey ha chungin goal li a lo khung tawh a, Wright-a hnua England tana match khata goal li khung hmasa ber record a siam bawk.
Tottenham Hotspur striker hian ram tan match 67-ah goal 48 a khung tling ta a, Gary Lineker nih rualin England tana goal khung hnem lamah Wayne Rooney (53 goals) leh Bobby Charlton (49) chiah a phak ta lo.
Season hmang ṭha lo tak Harry Kane-a'n international break-ah match hnih khelin goal sarih a khung a, Spurs boss Antonio Conte-a'n beiseina sang tak nen a player lo kir hun hi a nghak ang.
Inkhel Chhehvel
England hian kum 1964 khan USA chu 10-0 in an lo sawp tawh a, hemi hnua goal 10 an khung leh hmasak ber a ni.
England hian kum 2021-ah goal 52 an khung tawh a, heng zinga goal 16 chu Kane-a khung a ni.
Kane-a'n a zawnin hattrick a siam a, kum 64 liam taa Tommy Taylor-a'n a zawna England tana hattrick a siam hnua Three Lions tana a zawna hattrick siam leh thei hmasa ber a ni.
England-in tun qualifier-ah goal 38 an khung a, Euro emaw World Cup emaw qualifier-a goal an khung hnem ber record an siam.
Khualmuala min ṭawiawmtu fan-te tana inkhel en nuam tak kan chhawp chhuak. Goal hmaah kan hriam a, player naupang tak tak ram tana an inlan lai kan hmu bawk. Hei aia fiahna hautak zawk hi kan la hmachhawn ang tih chu ka hria a, mahse, zanin hi a awlsam emaw in tih chuan hetiang match-ah hian England tan ka lo feh chhuak tawh a, a awlsam vek bik lo. Player naupang zawk ten nuam ti taka an khel lai hmuh kha a nuam a, ka lawmna tak pakhat chu inthlahdah miah loa theihtawp kan chhuah reng kha a ni a, an hmaa chona ka chhawp apiang chu ka player-ten an chhang zel a ni. - Gareth Southgate, England coach