Badminton zir turin chhuak

Mizoram Badminton Association (MBA) leh TATA Trusts ṭangkawpin ITM University Badminton Academy, Raipur-a bad-minton zir tura a thlan, Mizo naupang 10-te chuan nimin khan Aizawl an chhuahsan.

ITM University, Raipur-a badminton zir tur Mizo naupangte hi chief national coach Sanjay Mishra kaih-hruainain September thla khan neih a lo ni tawh a ni. Naupang thlanchhuahte hi Under-13 leh Under-17 inkara khel tur an ni hlawm a, badminton ringawt zir loin lehkha an zir nghal bawk ang.

MBA chuan ITM University-a zir turte hi Gopi-chand Badminton Academy, Hyderabad a trial nei tur mi 28-te nen Thawhṭanni khan Aijal Club-ah thlahna hun an nei. Hetihrual hian ITM-a awm turte hian Gopichand academy-ah hian trial an nei ve hmasa phawt dawn a, an tlin chuan ITM lam pan loin Gopichand academy-ah an awm tlang ang.

Gopichand Badminton Academy a trial turte hi Tata Trust hmalaknaa din, Regional Development Center (RDC), Ramhlun Indoor Stadium leh Serchhip lama coaching kal mekte bakah Mizo ṭhalai beiseiawm thlanchhuahte an ni a, November 29-ah Aizawl an chhuahsan thung ang.

India rama badminton zirna lar ber pawl Gopi-chand academy-ah hian Ramhlun Venglai naupang Saitluangpuia Sailo leh Sainunmawia Sailo te an awm mek a, anni hi unau niin MBA media & publicity secretary Dr. K. Vanlaldinpuia chuan, "An unauin an academy tournament-ah pawh an che ṭha rih hle," tiin beiseina an neih san thu Vanglaini an hrilh.