Chhim lamah ni a chhuak e
Kum 2010 Pawlkut Thla ni 30 a ni a, New Zealand ram Lincoln khua, Bert Sutcliffe Oval Cricket khelmualah chuan Australia Under 19 captain Mitchell Marsh a chuan, ICC Under 19 champion nomawi a chawi.
Hemi ṭuma Aussies team innghahna bowler chu Jose Hazlewood niin final-a an hneh tak Pakistan player-ah hian a sakhming an koh Babar Azam pawh a tel ve nghe nghe.
Kum 11 hnuah
November 2021, Sahmulphah thla tahrik ni 14 zan a ni a, Dubai International Stadium-a ICC T20 World Cup final-ah kum 11 liam ta Under 19 World Cup-a inhmachhawn tawhte an intawng nawn.
New Zealand-a khelh U19 World Cup quarterfinal-ah Aussies-in James Neesham a telna mualneitu chu an hneh. Kum 11 hnuah Mitchell Marsh chuan Kiwis lakah a thiam thil lantir lehin ropuina ramah Australia a hlangkai ta.
Tun ṭum final-ah Jose Hazlewood a vawm ṭha takzet a, ani hi Marsh nena U19 World Cup champion tawh a ni. Australia-in a vawi khat nan T20 World Cup nomawi an chawi lai en a, Marsh leh Hazlewood te hnehna hlodo chham chunga dressing room-a an inkuah leh champion lawmna champagne an han inleih vel lai hlimthla han hmuh chuan, hringnun hi a kualna ngaiah let lehin history hi a thleng nawn leh ṭhin an tih ṭawngkam hi a dik ngei tih a nemnghet theih.
Grand Finale
Semi Final boruak rit tak paltlanga, mahni inrintawkna sang tak nena final lut ram ṭhenawm New Zealand leh Australia inkhel tur a ni bawk. Infiamna khawvela boruak (rivalry) nei lian ber zinga mi an ni bawk nen, chak zawk tur rin thiam lah a har narawh.
Amaherawhchu ṭhumvawrin nasa takin game kalphung kawngro a su dawn tih a hriat a, Australia lamin vawm hmasak an thlan aṭang kha chuan inkhel ṭan hma ngawtin dinhmun ṭha zawkah an ding a tih theih.
Mi ropui inlar hun
T20 hi tha ngah leh ball vaw na te chauh game a ni bik lo tih khawvel hmuha pholang turin Kane Williamson a rawn ding chhuak. Kiwis captain Williamson hian skills leh technique dik hmangin stage sang berah tunge a ni tih khawvel hmuhah a pholang nawn a; batsmanship quality sang ber demonstration kan hmu hi a ni ber awm e. Mitchell Starc-a ball vawm Williamson-a hlap sual chu Jose Hazlewood-a'n a thlauh palh tih loh chu Kiwis captain hi final-ah chetsual a nei lo a, tui chungah kein a kal a ni ber.
Champion lo ngat se chuan Mitchell Starc tan zan theihnghilh tlak a a ni ngei ang. Captain leh batsman ropui Williamson a hmahruaina zarah Kiwis hoin 172 runs an vaw chhuak. Ball 48 lek hmachhawn chunga 85 runs thlawh chhuak thei Williamson hian T20 World Cup ṭum sarih huaihawt tawhah final-a mimal score ṭha ber record a siam.
Aussie pacer Jose Hazlewood leh tun World Cup-a bowler vawm ṭha ber zinga mi spinner Adam Zampa te hnathawh ṭhat fak tel a ṭul. Bowler ṭha pahnih zarah New Zealand-in run tam zawk an siam loh phah a, Australia batsman hmabak a ziaawm sawt.
Thawh hnihna
Australia ho vuak hun a thleng a, 172 runs um hi final boruak nen chuan thil awlai a ni lo tih hre phawt ila. Captain Aaron Finch a form ṭha lo lang lehin, dressing room lamah a let leh vat.
Aussies ho tan David Warner, Mitchell Marsh leh midang chungah innghah a ṭul ta a, batsman-te hna a awlsam nan dai tla tura ṭawngṭai a ṭul bawk. Rei loteah ṭawngṭai chhanin a awm a, Kiwis ball vawmtuten ball hnawng chu an duh angin an thunun thei ta lo.
Marsh 3-na
Captain Finch-a out vat avangin pathumnaah Warner thlawp turin pathumnaah Mitchell Marsh a rawn lut. Marsh hi cricket khelh thiam chhungkua aṭanga seilian a ni a, tun hmain amaha beiseina sang tak a phak ṭhin loh avangin a talent a phochhuak zo lo tia sel a ni fo ṭhin.
A chunga beiseina sang tak an nghat hi a mak lo. A pa hi, a vanglaia Australia batsman ropui Geoff Marsh a ni a, a u Shaun Marsh pawhin vawi duai lo Australia hming a ti ṭha tawh bawk.
Mitchell Marsh hi a khat tawka a lo inhliam ve sek bawk nen, an selna hi a dikna chin pawh a awm. Amaherawhchu, Marsh chhungkaw hmingthang tak chawi nung zel turin T20 final chu a ta emaw tih mai turin Marsh naupang bera chu a rawn pen chhuak.
Coach Justin Langer-a'n a ṭhatna leh team tana a thawhlawkna tur ber no. 3 position a pek tlat chu, thu chu tisaah chantirin, Mitch Marsh a chuan hawikir leh zai a rel tawh lo.
A hma lawka kan sawi Kane Williamson-a'n hlap nat satliah, power leh tha chak satliah ni lo a, skills leh class hmanga batting lesson khawvel a zirtir letling thawk Marsh a rawn che thung. Marsh hian a palen leh tharum ngahna hmangin duh duhnaah ball a vuak theih tih rawn kawhmuh tum ni awm ziazangin, Kiwis bowler te chu khelmual leh mipui ṭhutna kil tinah ball a hlap kualsak a ni ta ber mai.
Fielding ai mahin Kiwis ho chu ball boy chan an chang a ni ta deuh ber mai.Dai tlak vanga ball ṭhuaivir har ti, Kiwi spinner Ish Sodi a chungah ngil a nei lo lehzual emaw tih mai tur a ni nghe nghe.
Ashes Series 2019 an khelh laia, interview tu pakhat hnenah, "Australia mipui zawng zawng hian min hua ni ber hian ka hria a, mahse engtik niah emaw chuan min la lawm rawn dawn," tiin Marsh hian ṭawngkam a chhak chhuak tawh a, chu ni chu a lo inher chhuak ta ngei e.
A kin ta
Leilung pian tirh ata cricket history-a record nei ṭha ber Australia chuan, cricket ram ropui an nihna a takin a tilang chiang leh ta.
Nomawi chi tin reng an hunna hmuna la awm lo awmchhun - T20 World Cup chu an hung veleh dawn ta a, an ṭhenawm ram New Zealand erawh hman ni lawkah ICC Test champion ni mah se 'champion hlei thei lo' tia an chanchin la sawi hrih a ṭul dawn a ni.
Tlipna
Indian Premier League khel zawh hlim hlawt a ni a, IPL khelhna hmun UAE ramah vek hian ICC T20 World Cup chhunzawm leh nghal a ni a. Thla hnih tal tawp chu T20 inkhawmpui ropui tak cricket khawvelin a hmang. IPL-ah Chennai Super Kings an champion a, T20 World Cup-ah Australia an champion leh tak avangin kumin na na na chu rawng eng lar ber kum kan ti thei awm e.
IPL final zana Chennai Super Kings banner eng zawng zawng kha he Dubai International Stadium ah hian paih bo ngai miah loin kawr eng ha Australia ho chuan hmang ṭangkai zelin, November 14 zanah pawh 'a eng' a lar ber.
He thuziak in chhiar meuh chuan New Zealand ho pawh hnung lama thil awmte kalsan chungin, inkhel turin India ram zin a ṭul leh tawh. Zanin hian Jaipur-ah Kiwis hian T20-ah India an hmachhawn dawn. Aussies ho erawh champion lawmna nih pah fawmin, December thla tira Ashes series an thlen tur inbuatsaih hma, chawlh rei lote an hmang thung ang.
Lawmman sem programme a zo a, player langsarten khelmual kil khatah chuan khawvel media-te zawhna hrang hrang an hmachhawn. Media hmachhawn zingah kum hnih liam taa ICC World Cup (50 overs) a vanduai vang liau liaua champion zo ta lo Kane Williamson pawh a tel.
New Zealand captain chuan vanduaina thuah hnih tawn zanah pawh khawvel hmuha a mizia - infiammi nungchang mawi zet mai chu a pholang. Williamson-a'n, "Zanin chu a khel ṭha zawk team an champion a ni e," a tih ṭawngkam hi ṭawmpuiin, he T20 Kut-pui ropui tak hi Silly Point hmangin kan mangṭha ve ang e.
- K. Vanlalruata