Zanin dar 7-ah India Vs New Zealand

India leh New Zealand te chuan zanin dar 7:30 aṭangin T20 match thum an khelh tura hmasa ber chu Sawai Mansingh Indoor Stadium, Jaipur-ah an khel dawn.

Men in Blue hi coach thar Rahul Dravid hnuaia an khelh dawn bakah captain thar Rohit Sharma hnuaiah an khel ang.

T20 World Cup khelh zawh takah khan India hian Pakistan an hneh loh zawha New Zealand laka an tlawm avangin semifinal an thleng zo lo.

Black Caps pawh hian final hial thleng mah se an tum ram an thleng thei ta bik lo a, nomawi inchuhnaah Australia lakah an tlawm.

Final khelh aṭanga ni thumnaah New Zealand hian India an hmachhawn lehnghal dawn a, final-a che ṭha captain Kane Williamson an hahdamtir dawn. Hemi a nih avang hian Black Caps hi Tim Southee captain-na hnuaiah an khel dawn.

Southee chuan, "Kane Williamson hi theihna nei sang bik a nih avangin a tel lo hi channa nasa tak a ni a, chutihrualin player dang tan hun ṭha a ni thei bawk. New Zealand tana ka captain thei hi ka inchhuang hle," tiin a sawi.

T20 World Cup ṭan hmain Virat Kohli-a'n World Cup zawhah T20 captain aṭanga a chawlh tur thu a sawi lawk a, tun ṭumah hian Kohli hi hahdamtir a ni.

Chutihrualin India leh New Zealand te hian Test match vawi hnih an khel dawn a, Kohli hian captain hna chelh turin Test match vawi hnih khelhna aṭangin a inlan ṭan ang.