F1 driver tur Guanyu Zhou

Formula 1 team Alfa Romeo chuan season thara an driver atan Guanyu Zhou an lalut. Ferrari driver academy chhuak Zhou hi Chinese tlangval zinga F1 driver hmasa ber a ni dawn a, tawnhriat nei ṭha Valtteri Bottas nen an inkawp ang.

Tun season tawp rualin Kimi Raikkonen a chawl dawn, a hmun ruakah hian Mercedes car khalhtu Bottas hi a awm ang. 2019 aṭanga Alfa car khalh tawhtu Antonio Giovinazzi chu Zhou hian a thlak thung dawn a ni.

F2 lamah chuan Zhou hian tawnhriat a nei ṭha angreng hle. Kuminah Grand Prix pathumah hnehna a chang tawh, inelna hmabak pahnih an la neih turah pawh beisei a nei sang hle.

Kum 22 mi Zhou chuan, "Formula 1 huanga zuang lut tur hian ka inpeih a, infiamna ka ngainat leh duh bera hun ṭha ka nei thei tur hi ka lawm hle. Khawvel driver ṭha berte zinga mi Valtteri Bottas nena kan inkawp thei tur hian min ti lawm zual," a ti.