Denmark ngamtu Scotland tan beiseina

Scotland chuan World Cup qualifier-ah an mikhual Denmark chu 2-0 in an hneh a, mualneitu team tan hian Heart of Midlothian centre back John Souttar leh Southampton forward Che Adams te chuan goal khat ve ve an khung.

Team pahnih intawn hma hian Danish team hi World Cup khel tura an tlin chian tawh avangin result hian Denmark dinhmun erawh a sawi danglam pha lo a, Scotland pawh inkhelh hmaa an dinhmun pahnihnaah tho an awm - playoff an khel dawn.

Mahse, Scotland hian hnehna an chan avangin pahnihna ti ṭha zual paruk zingah an tel phak a, hei vang hian nakkum playoff khelh tur atan seeded team an ni dawn - an tan chuan Denmark hneh hi result ṭha a ni.

Denmark hi Euro 2020 final-a England an ngam loh hnuah khan match ruk chhung chu a zawnin an chak tawh a, team pahnih player neih dan thlir pawhin Danish team hian rin an hlawh zawk.

Mahse, Scotland an khel ṭha a, Denmark-in hliam vangin an ṭhat dan berin khel lo mah se hliam vang thoin Lyndon Dykes, central defender Grant Hanley leh Jack Hendry bakah Scott McTominay te an chhawr thei lo ve tho a, an tan chuan result lawmawm a ni.

Scotland tana goal khungtu Souttar tan zan danglam bik a ni bawk - kum 2018 khan Souttar hian Scotland tana a match hnuhnung ber chu Israel lakah a khel a, hnawhchhuah a ni.

Kum 2019 khan hliam vangin a talbuai zui a, season hnih chhung inkhel mumal loin a awm - mahse, a hunah tak ram tan a vul leh ta.