A bul ṭan nan Djokovic a chak

ATP Fianls khelh mekah Novak Djokovic chuan Thawhṭan zan khan a match hmasa ber a khel a, a khingpui Casper Ruud lakah 7-6 (7/4), 6-2 a hnehna changin inelna bul a ṭan fuh hle.

World number 1 hian a group match pahnihna atan zanin hian seeded pangana Andrey Rublev a hmachhawn leh dawn. Rublev hian inkhel dangah Stefanos Tsitsipas chu 6-4, 6-4 in a lo hneh ve bawk.

Serbian star Djokovic-a'n ATP Finals nomawi hi vawi nga a chawi tawh, champion hnem ber Roger Federer tluk turin vawi khat chiah champion a mamawh tawh, tunah hian record duhawm siam tumin bul a ṭan tihna a ni.

Kum 34 Djokovic chuan, "Italy rama inkhelh hi chu a nuam ṭhin, tun hma pawhin duhsakna hrang hrang ka dawn tawhna hmun a ni. Serbia tih lohah chuan ka in pahnihna a ni a, inkhelh a nuam ka ti ṭhin hle," tiin a sawi.

World ranking lamah Djokovic hi number 1 ni chunga season tawp hmang tur a ni a, ranking sang ber ni chungin a kum sarih hun a hmanna chiah a ni; Pete Sampras nen record inṭawm an nih a khum avang hian chawimawi nan nomawi an hlan.