Inelna nuam tak a ni - Verstappen

Max Verstappen chuan Lewis Hamilton nena Formula 1 title inchuh chu nuam a tih thu a sawi a, intlansiak hnuhnung bera a chak loh chhan chu midang tana chhiatna thlentir a duh loh vang a nih thu a sawi.

Sao Paulo Grand Prix-ah Mercedes driver Hamilton-a'n hnehna changin, a hnungah a elpui Verstappen a thleng thung. Champioship lamah chuan Red Bull driver hi a la chungnung zawk.

Dutch tlangval Verstappen chuan, "Brazil-ah khan kan theihna zawng zawng kan hlan, a hmasa bera kan thleng thei ta lo kha a pawi hle. Intlansiak nuam leh hlimawm a ni a, inelna pakhat mai ni loin championship thlenga nghawng nei na a nih avangin a nuam zual.

"A nihna tak sawi chuan kawng kawi ṭhenkhatah kha chuan mahni hma sial takin tlan ni ila chuan buaina a chhuak thei ang, midang tihpalh hlau tak chunga ka tlan avangin kan buai lo ni maiah ka ngai," tiin a sawi.

F1 vawi sarih champion tawh Hamilton leh Max te an inel tawk em em a, tu zawk nge season tawpah chungnung zawk dawn tih hriatthiam a la har hle. Season tawp hmain inelna pathum - Qatar, Saudi Arabia leh Abu Dhabi GP te an la nei dawn.